No.2419/2021-2022

Aizawl, 1st October, 2021 : Nimin chawhnu dar 1:00 khan Pu C.C. Lalchhuangkima, Deputy Commissioner & Chairman, District Disaster Management Authority (DDMA), Khawzawl District kaihhruaiin Zaingen Branch YMA Hall, Khawzawlah Covid-19 hrileng vanga inkhuahkhirhna kalpui dan tur ngaihtuahin Extended DDMA meeting neih a ni.

Khawzawl District Bawrhsap Pu C.C. Lalchhuangkima chuan Covid-19 hrileng vanga hunrei tak inkhuahkhirhna kalpui tawh chuan nasa takin nunphung leh khawsak a nghawng a ni, a ti a. Tun dinhmunah Khawzawl District-ah hrileng dinhmun a ziaawm chhoh hret hret avang leh, eizawnna leh hmasawnna hnathawh hrang hrang kalpui a tul avangin inkhuahkhirhna hman lai chu ennawn tura meeting koh a nih thu a tarlang a ni.

Dr. Lalnunpuii Renthlei, Medical Officer (Ayush) i/c Covid-19, Khawzawl District Hospital hnen atangin Covid-19 contact tracing leh Quarantine chungchanga Mizoram Sawrkar inkaihhruaina (SOP) thar ber ngaihthlak a ni a. Hemi hnu hian District chhunga inkhuahkhirhna kalpui dan tur sawiho a ni.

DDMA meeting chuan hunbi neia dawr leh bazar hawn thin chu Restricted Area ni lo hmun dangah chuan nitin zing dar 6:00 atanga tlai dar 5:00 hawn nise tiin a rel a, Restricted Area-ah te chuan Village Level Task Force (VLTF) ten mipui mamawh dan a zirin ruahmanna an siam ang. Sakhaw biak inkhawm pangngai chu la rem rih lo a ngaih a nih laiin zing tawngtai inkhawm leh Kohhran rorel inkhawmpuite chu SOP tha taka zawm chungin kalpui theih a ni dawn a, mipui punkhawmna dang heng- birthday leh anniversary lawm, book release, lungphunte chu mi 25 aia tam lo tan phal nise ti a rel a ni bawk. Heng hunahte hian ei leh in sem erawh phal a ni dawn lo a ni.

Zirna in hawn chungchang chu VLTF ten an khua/veng theuha Covid-19 dinhmun uluk taka thlir chungin an ngaihtuah ang a. School hawng tura thutlukna an siam a nih chuan, an kalpui tum dan ruahmanna chiang taka ziakin District Education Officer kaltlangin Deputy Commissioner hnenah school hawn dilna an thlen dawn a ni.

Restricted Area ni lo hmun dangah chuan hmasawnna (mimal leh sawrkar) hnathawh leh lo/huan lama hnathawhte chu Covid Appropriate Behavior leh SOP tha taka zawm chungin phal a ni a. Public Park leh Picnic spot-te pawh Mizoram sawrkar SOP zulzuiin zing dar 9:00 atanga tlai dar 5:00 thleng mi 25 aia tam lo tan hawn phal a ni. Passenger phur chi eizawnna lirtheite chu service pangngai anga tlan lovin, hiring system a hman phal a ni thung ang.

DDMA meeting-ah hian sawrkar department hrang hrang hnathawkte hmanga Covid-19 Executive Duty kalpui mek chu tihtawp nise tih a ni a, sports practice chu indoor-ah mi 10 aia tam lo leh, outdoor-ah mi 25 aia tam lo tan phal nise ti a rel a ni bawk.

Nimin meeting-ah hian Pu H. Lalramenga, SDC in Covid-19 SOP tur sawihona a kaihruai a, Pu James Lalnithanga, SDO(Sadar) chuan lawmthu sawiin hun a khar a. Meeting-ah hian Khawzawl District Disaster Management Authority member-te bakah Khawzawl District chhunga VLTF aiawhte, Sub-Headquarters YMA aiawh leh Khawzawl Town chhunga Branch YMA aiawhte theuhte an tel a ni.