No.2420/2021-2022

Aizawl, the 1st October 2021 : Vawiin khan Home Minister Pu Lalchamliana chuan Pachhunga University College in an zirlai naupang Mizoram University Undergraduate Examination 2021 a tha taka passed chhuak tharte lawmpuina ‘Felicitation’ an buatsaih chu an College Auditorium ah khuallian niin a hmanpui.

Home Minister Pu Lalchamliana chuan, 'Zirna hian mihringte hi mipuitlingah min siam a tum ber a, pass that ni ngawt lovin mahni tan, khawtlang tan leh ram tana mi tangkai siam hi a tum a ni a. Zirna hian hriatna leh thiamna min pe ngei a. Chutih rualin zirna leh hriatna tihpun ni ngawt lovin, mahni puala khawvel hmachhawn thei tura min siamtu a ni tih hi kan hriat a ngai a ni,' a ti a. Zirlai tan 'T' pathum a pawimawh hle tiin, chungte chu Tumruhna, Taimakna leh Thawhrimna te an ni a, thatlai huna hrehawm ti taka peihlo chunga lehkha zir hram hram hi a tawpah an hlawhtling a, an hahdam thin tiin zirlaite te hi a fuih a. Mizo zinga All India Services tling thei kan tlem chhan pawh hi 'T' pathum kan tlakchham tak vang hi a ni maithei tiin a ngaihdan a sawi lang a ni.

Khuallian chuan, kum 34 chhung zet zirtirtu ka nih ve chhung khan, 'born teacher' ka ni lo tih hrechungin ka theih tawp ka chhuah ve niin ka hria,' a ti a. Zirtirtute chu, Engtinnge kan zirlaite hi a tha thei ang bera kan chhuah theih ang tih ngaihtuah fo turin a chah a ni.

Felicitation Programme-ah hian Pachhunga University College Principal, Prof. H. Lalthanzara chuan, khuallianin 'T' pathum a sawi bakah khan 'T' pakhat dang a la awm a, chu chu "Tawrhchhelna' a ni a ti a. Zirlaite hian Taimaknate, Tumruhna te, Thawhrimnate bakah Tawrhchhelna in neih phawt chuan in hlawhchham ngai lovang,' tiin zirlaite a fuih bawk.

Zirlai pass chhuak zingah Arts stream-a mark hmu sang ber Lalnunpuia Renthlei, Department of Political Science hnenah H.K.Bawichhuaka Award hlan a ni a. Science stream-a mark hmusang ber pahnih - C.Laldinpuii, Department of Physics leh Millenium Vanlalpeka, Department of Zoology hnenah 'Lenrual Hlui Award' hlan an ni. Management leh Commerce stream-a mark hmu sang ber Lalremsangpuia, Department of Commerce hnenah 'Khawtinkhuma Award' hlan a ni bawk. Heng Award hian Certificate leh tangkafai Rs. 10000 a keng tel a, lawmman te chu an chhungten an tum thin a ni. Heng Award te hi khuallian hian a dawngtu hnenah a hlan a ni.

Mizoram University hnuaia Undergraduate Examination 2021-ah rank holder 233 an awm a, chung zinga 156 chu Pachhunga University College zirlaite an ni a. Za zela 66.95 an hauh pha a ni. Rank holder zingah hian topper 17, second rank 17, third rank holder 17 bakah rank holder 105 an awm. Heng zirlaite hi lawmpuina certificate leh tangkafai pek an ni a. Rank holder te tan hian Rs. 1,29,000 zet semchhuah a ni.

Principal hian College Annual Magazine a tlangzarh nghal a, 'Student of the Year' atana thlan Laetitia Lalrinngheti, Department of Economics hnenah chawimawina a hlan bawk a ni.

Pachhunga University College-ah hian Principal Prof. H. Lalthanzara kaihhruaina hnuaiah undergraduate-ah Arts, Science, Commerce leh Management zirna awmin, department 23-ah zirlai 3014 an awm a. Post Graduate department pali - Mizo, Philosophy, Life Sciences, Geophysics awmin zirlai 89 an awm mek a. Life Science department-ah Ph.D zirlai 12 awmin PU College-ah hian zirlai 3103 an awm mek a ni. Heng bakah hian PUC faculty hnuaiah Ph.D zirlai 20 vel zet an awm bawk. Under graduate zirlai zingah hian ramdangmi (foreign students) pahnih an awm a, Mizorama foreign students nei thei awmchhun a ni.

Attachment

  • Loading attachment...