No.2421/2021-2022

Aizawl, the 1st October 2021 : Vawiin chawhma khan Association for Voluntary Blood Donation (AVBD) leh Chanmari Branch YMA tangkawp buatsaihin National Voluntary Blood Donation Day 2021 chu Chanmari Hall, Lungleiah hman a ni. Dr Lalramzauva, Director, Christian Hospital Serkawn chuan a hman pui a ni.

Vawiin program Pu R Lalrochama, Financial Secy AVBD Lunglei kaihhruaiah Dr Lalramzauva chuan thu sawiin medical field ah hmasawnna hrang hrang leh hmanraw tha tak tak hmuhchhuah zel ni mah se thisen tluka nunna chhanna atana tangkai hi ala awmlo a ni tiin midang kan tanpui theihna hlu ber chu a thlawna thisen pek hi a ni, a ti a. Mizoram hmun hrang hrang ah YMA, Zirna in, kohhran hrang hrang leh pawl dangte hmalknain a thlawna thisen pek kan uar hi a lawmawm takzet a ni, a ti bawk. Kalkhawmte chu a thlawna thisen pek uar deuh deuh tur leh mahni pek mai duh tawk lova midang te pawh thisen pek hlutna zirtirtu leh kawhhmuhtu ni theuh turin a chah bawk a ni.

Pu H. Lalthangliana, Secretary AVBD Lunglei chuan report pe in Covid-19 hrileng avangin kum dang anga a huhova blood donation camp te buatsaih anih theihloh thu sawiin veng/pawl thisen pe duh te chu Covid Appropriate Behavior zawm chungin Blood Bank thawktuten a hmunah an kal chilh thin thu a sawi. National Voluntary Blood Donation Day 2021 pual hian YMA Chanmari Branch ten thisen an pe dawn a ni.

AVBD Lunglei hi 19th October, 2001 din a ni a, Lunglei ah Blood Bank pahnih Civil Hospital leh Christian Hospital Serkawn ah awmin zirlai, YMA leh pawl hrang hrang thahnemngaihna avangin damlo ten thisen an dawng thin.

National Voluntary Blood Donation Day hi kum 1975 atang khan India ram pumah kum tim hman a ni thin a. A thlawna thisen pek kawnga India rama hmasialtu pawimawh ‘Father of Transfusion Medicine in India’ tih a koh thin Dr. J. G. Jolly piancham hriatrengna niin India ram hmun hrang hrangah awareness campaign leh a thlawna thisen pe tha te chawimawina hun hman thin a ni.

Lunglei District-ah pawh National Voluntary Blood Donation Day hi kum tin urhsun taka hman thin niin thisen pe tha te chawimawina hlan an ni thin a. Kuminah chuan Covid-19 hrileng avangin function lian tham buatsaih theih ani ta lo a ni.