No.7884/2020-2021

Aizawl,  23rd March 2021 :Parliament budget session kal mekah vawiin khan Mizoram Rajya Sabha MP Pu K.Vanlalvena chuan Zero Hour ah thu sawiin Mizoram-ah Myanmar leh Bangladesh Consulate  office hawng turin sawrkar laipui a ngen .

Pu Vena chuan British awp hun laiin Mizoram atanga Kolkata kal turte chu Chittagong, Bangladesh kaltlangin Khawthlang tuipuiah lawngin an kal thin a ni, a ti a.  He lawng kawng hi India independence tirh atanga tun thlengin kum 75 chhung khar a ni tawh a ti a. Mizoram leh Bangladesh chuan ramri KM 318 kan neih thu leh ramri za zela sawmruk(60%) vel zet chu kum tluanin lawng tenau hmanga kal theih a nih thu a sawi a.

Kum 75 chhung Bangladesh nena inkal pawhna kawng khar a nih avangin Mizoram chu ram mawngping(land locked) a nih phah tih sawiin Pu Vena chuan Mizoram atanga Bangladesh leh Myanmar kal tur chuan Kolkata a kal hmasak zel a tul a, heihi Mizo mipuite tan a buai thlak thu a sawi a.

India sawrkarin India leh Bangladesh insumdawn tawnna tur Tlabungah Trade Centre a buatsaih mek chu Mizo mipuite aiawhin Sawrkar laipui hnenah lawmthu a sawi a.Trade Centre mai ni lovin, Consulate office din tel turin Sawrkar laipui chu Mizoram MP chuan a ngen a ni.