Nimin chawhnu dar 3:00 PM khan Renewal and Augmentation of Saiha Greater Water Supply Scheme Lungphum chu Main Reservoir hunna tur hmun Saiha Helipad tlangah Chief Minister Pu Lal Thanhawla’n a phum. Pu Kunal Deputy Commissioner, Saiha District kaihhruai Lungphum inkhawm Saiha Helipad-ah neih nghal niin, CM Pu Lal Thanhawla chu khuallian a ni a, Pu H. Zothangliana, Parliamentary Secrectary i/c PHED chu khualzahawm a ni thung.

Lungphum inkhawmah hian thusawiin, Chief Minister Pu Lal Thanhawla chuan Mizoram-in a kum tela tui harsatna kan tawh thin sukiang tura Mizoram sorkar-in thei tawp chhuah a, hma alak mek thu a sawi a. He Renewal and Augmentation of Saiha Greater water Supply Scheme pawh hi chutiang hmalakna kal mekte zinga pakhat a ni, a ti. Pu Hawla chuan sawi zelin Ram Ro tling thei tur thil tam tak chu neihtu rilru kan put thin lo avang a pamtul ta leh rilral ta a tam thu a sawi a. Mipui kalkhawmte chu rinawm tak leh neihtu rilru nena thahnem ngai taka sorkar hmalaknate puihbawm thin turin a sawm bawk.

Parliamentary Secretary Pu H. Zothangliana pawhin lungphum inkhawmah hian thusawiin, kum hnih-thum kal ta chhunga Mizoram chhunga tui harsatna sukiang tura sorkar hmalak tawhna leh hmachhawp hrang hrangte sawi langin, tun atanga kum reilo te ah chuan Mizoram mipui te hian tui hnianghnar taka hman tur kan nei tawh ngei ka beisei, a ti bawk.

Er. Vanlallianzuala, Chief Engineer (M&I), PHED chuan Technical Report pe in, Renewal and Augmentation of Saiha Greater water Supply Scheme hnuaia hian Tuitlawk lui atanga nitin tui litre maktaduai 2 leh nuai 5 pump chho tum a ni a. Chu chuan kum 2043 thleng nitin mi pakhat tan litre 70 zelin mihring 49,700 chawm thei tura an beisei thu a sawi a. Chhiarpui hnuhnung berah Saiha khawpui ah mihring 25,065 an awm a, chawhrualin nitin an tui mamawh zat chu litre nuai 17 leh sing 5 vel a nih laiin, chawhruala nitin Saiha khawpuiin tui litre nuai 4 leh sing 5 vel chauh an hmu thei a ni, a ti bawk. He Renewal and Augmentation of Saiha Greater Water Supply Scheme tana sum an hmuh chu cheng maktaduai 207 leh sing 2 vel a ni a, Urban Ministry a tanga lokal a ni, a ti.

He Renewal and Augmentation of Saiha Greater water Supply Scheme lungphum inkhawm hi Chief Minister Pu Lal Thanhawla leh a nupui Pi Lal Riliani baka, Pute: H. Zothangliana, Parliamentary Secretary; R. Lalrinawma, Chairman Law Commssion; T.T. Zothansanga, MLA te leh MADC hruaitu te, Saiha District Head of Office te, chanchin thehdarhtu te leh tlawmngai pawl hrang hrang hruaitute kokim takin an tel a ni.

Pu H. Sahlo, Executive Member (LAD) MADC in lawmthu sawina neiin lungphum inkhawm hi a tin a ni.