Chief Minister Pu Lal Thanhawla’n vawiin khan Sipai Lak Runpui neih mek, a nithumna leh a tawpni ni bawk chu Rajiv Gandhi Sports Stadium Mualpuiah a hmanpui a, Rally a tlan tur Batch khat chu field-ah a vailiam bawk. Chief Minister hi Parliamentary Secretary Lt. Col. (Rtd.) ZS Zuala; Pu PP Thawla MLA; Aizawl SP leh Aizawl DC aiawh ten an tawiawm a. He hmunah hian Additional Director General (Recruiting) Brig. V. K. Singh-a chuan Chief Minister hi Rally kalpui dan chanchin kimchang a hrilh a ni.

Chief Minister chuan he hunah hian sipai lak runpui a intlar thalai za tam tak hma ah thu sawiin ram buai hma in Mizo te sipai a lut an tam a, mahse ram buai hnu hun rei tak thleng sipai a lut chu an kiam a, tuhnaia hemi kawnga Sawrkar in theitawp a chhuah chuan rah tha a chhuah a, hun reilo te chhunga Mizo thalai sang tel sipai a an lut thei ta hi a lawmawm a ni, a ti a. Sipai a lut te hi khua leh tui tha an nih thin thusawiin, kawng tam taka mientawntlak a ni bawk thin, a ti a ni.

Sipai intlarna ah chhunglam leh pawlam nun uluk, zuk leh hmuam leh thil thalo dang tam tak laka fihlim thalai heti zat an kalkhawm thei chu lawmawm tiin sipai hi hna tha tak, hna zahawm, hna pawimawh leh chhungkaw chawmna hna tha a ni, a ti a. Sipai intlarna a tling te chu a lawmpuina leh duhsakna hlanin an awmna hmun apianga Mizoram ti hming tha a, mi entawntlak ni a, ram leh hnam venhim hna tha taka thawk turin a fuih a. Hetih rual hian a tling lo te pawh beidawng lova, sipai intlarna hun dangah leh paramilitary force-ah te an luh theih nan theitawp chhuah zel turin a fuih bawk a ni.

Ni 7 leh ni 8-a Rally, Soldier (General Duty) lakna turah khan mi 4800 vel an intlar a, chung zinga 660 bawr vel chuan Intlansiak (minit 6-a kilometer 1.6) chu an patlang. Hemi hnu hian an san zawng te, an rih zawng te, an awm an tilen thei chin te teh a ni a. Physical Fitness Test-ah bar pull up te, zig zag path te, push up te an tih leh a. Hemi dawt ah hian an document neih te endik leh a niin a tawp berah chuan an hriselna endik a ni a. Heng zawng zawng an paltlang chauhin Written Test an pei thei ang. Chumi hnuah chauh a tling te hming tarchhuah a ni thin. Sipai a luh tum hi thil namen lo, theihna zawng zawnga beih ngai a ni a, a chhan chu a chunga tarlan ang zawng zawng khi an paltlang vek a ngai thin a ni.

Vawiin hian Soldier (Technical); Soldier (Nursing Assistant) leh Soldier (Clerk/Storekeeper) te leh Sipai bang fate tan rally neih a ni.