Nimin tlai dar 2 khan Pu Lal Thanzara Minister Health & Family Welfare, Minor Irrigation leh I & CT chuan Champhai a thleng a, Circuit House ah Champhai a Head of offices, Khawtlang hruaitu ten an lo hmuak. Hemi hnu tlai dar 3:00 hian Champhai a Minor Irrigation department hmalakna chi hrang hrang - tui kawng laih leh Champhai zawl a zau hrang hrang te a tlawh nghal a, he hunah hian he zauva leilet neitu ten leilet chawmna atana tui lakna kawnga harsatna an tawh dan te a hmunah kalin a enfiah sak a. Minor Irrigation hnuaia tuikhuah te pawh tlawh nghalin department hotute nen hmalak chhunzawm zel dan tur an thlirho nghal bawk.

Pu Lal Thanzara hian tukin zing khan Chhangphut Field a Phullem (artificial turf) phah mek a hmunah kalin a en nghal a, CDFA hotuten lo dawngsawngin Chhangphut field-ah hian inkawmhona hun tawi buatsaih a ni. Minister ho hian Field tih puitlinna tura hmachhawp leh tul pawimawhte sawiho a ni a. Health Minister hian Chhangphut Field panna kawng tha tawh lo leh Gallery kiang Black top-na tur Estimate pawh siam nghal turin EE, PWD chu a hriattir nghal a ni. Hemi hnu hian Champhai District Hospital, khum 100 awm theihna tur building sak thar mek a en leh a. Hospital thara Power chungchanga harsatna la awm te sutkian a nih theih dan tur pawh sawiho a ni bawk.