Vawiin khan Pu Lal Thanzara, Health & Family Welfare Minister hovin I & PR Auditorium-ah Anti Dengue Month hawnna inkhawm neih a ni a. He hunah hian Pu Lalhmingthanga, Principal Secretary H & FW chu khual zahawm niin Dr. K. Ropari, Principal Director, H & FW in inkhawm hi a kaihruai a ni.
Pu Lal Thanzara chuan Anti Dengue Month hman hian a tum ber chu Dengue natna vei tih tlem leh Mizoramah a vei kan pun zel loh nana hmalaka Dengue vanga tumah kan thih loh nana theih tawp chhuaha hi kan tih tur a ni, a ti. Minister chuan tunlaiin khawpui chhungah chuan mi te an che thianghlimin compound te leh luikawrte an enkawl fai viau tawh a, mahse bawlhhlawh paihna leh zun in, ek in te kan la tifai tawk lo hle a, hemi kawngah hian tanlak a ngai hle a ni tiin thosi awm theihna tur compound samfai te, a pian punna tur tuitling tih bo te leh a vei niawma rin apiang damdawiina thisen la tura intirh vat hi a pawimawh a ni a ti.
Department hrang hrangte leh mipuite hian tih theih tam tak kan nei a, natna do hna leh invenna reng reng hi Health department chauh hmalakna tur a ni lo a, natna kan vei tam ber hi keimahni theuh kan inven thiam loh avangte leh kan in thlahdah vangte anih avangin, mipuite leh department te hian thosi pian theihna tih bo chungchangah mawhphurhna kan nei theuh a ni, chuvangin kan tanrual chuan a chhan kan hriatchian em em thosi ten an thehdarh natna Dengue te, Malaria te lakah hi chuan kan him ngei ang Minister chuan a ti.
Khualzahawm Pu Lalhmingthanga chuan Dengue chungchanga sorkar hmalakna tlangpui Sentinel Surveillance Hospital (SSH) Civil Hospital, Aizawl leh Lunglei ruat anih thu te, ELISA Reader leh Washer dah a nih thu leh Dengue chungchanga awareness campaign te neih anih thu te a sawi a.
He function ah hian Dr. Rohmingthanga Ralte, Director, Health Services chuan keynote address pe in Dr. Lalremmawii, Dy. Director, Malaria chuan Dengue natna, invenna, Mizoram dinhmun leh programme hmalaknate a tarlang.
Kum 2012 khan Mizoramah mi 6 Dengue vei hmuhchhuah a ni a, 2013 ah 7 hmuhchhuah leh a ni a, 2014 ah 19 hmuhchhuah a lo ni lehin kumin May thleng khan mi 19 Dengue vei hmuhchhuah an ni leh bawk a ni.
Dengue natna thehdarh tu Aedes thosi, thosi dum leh vara tial rik rek hi Mizoram ah a tam hle a, kan inven fimkhur loh chuan nasa takin he natna hi kan ramah a darh thei a ni. Dengue enkawlna bik damdawi emaw invenna vaccine a awm loh avangin ‘Tihdam aiin inven hi a awlsam zawka, a tha zawk bawk a ni’ tih inzirtir a pawimawh hle. Aedes thosi nu te hi Anopheles thosi nu te ang lo takin en laia mi seh ching an nih avangin naute leh naupang chhuna mu thin te chu thosilen zar hnuaiah ngei muttir thin tur a ni. Ramhnuai leh huana hnathawk thin te chuan kawr leh kekawr bantlawn hak hi thosi seh laka invenna pawimawh tak a ni.
