Pu Lal Thanzara, Health & Family Welfare Minister hovin vawiin khan Lal Thanhawla Auditorium-ah World Day of the Deaf hman a ni. World Day of the Deaf hi kumtin September thla Sunday hnuhnung berah hman a ni thin a, remchang zawkna avangin Mizoramah chuan vawiin khan hman a ni. Granville Richard Seymour, Philadelphia, Pennsylvania, USA a 1871 a piang, a naupan lai a damlohna avanga bengngawng, a chhungten theih tawpa an enkawlna avanga lemziak leh drama a khawvel pumpuia hming chher ta hriatreng nana tih a ni. Kumina thupui chu ‘With sign language, I am equal’ (Zaizira inbiakna chuan intlukpuina min siam) tih a ni.
Minister chuan vawiina he Ni kan hman nachhan ber chu ri hriatnaa harsatna neite hmakhua sut en nana mipui mimir in zirtir nan te, politician leh ri hriatnaa harsatna neite hmasawnna tur ngaihtuah sak thei thuneitute hnena ri hriatnaa harsatna neiten tih theih tam tak an neih ve te hriattir pah a, an mamawhte leh an chanvo dik tak an chan theih nana khawvel pumpui a an mahni tih phur leh tih thatho nana hman thin a ni tiin he World Deaf Day hi ‘Deaf Day’ ang ringawt a hmang lo in, khawvel finna lo thang chho zelin hmanraw thar (new technologies) a hmuh chhuah tharte hi ri hriatnaa harsatna neite pawhin an hman tangkai ve ngei dan tur ngaihtuah pui paha, an nun kawng hrang hranga thawvenna tur ngaihtuah puina Ni-ah hman theuh tum turin a chah a ni.
Tun hma chuan ri hriatna lama harsatna neite hi awmze nei loin mahni duh dan danin, kut zaizirin kan han be ve ngawt thin kha a ni a. Tunah chuan mithiamte inpekna azarah awmze neiin Mizote ngei pawn sign language hmang thei leh zirtir thei an lo awm ve ta hi ropui a tih thu Minister chuan a sawi a. Ram changkang leh India ram state lian-ah te ngei pawh rualbanlo te enkawl na chungchangah “inclusive education” an uar thar em em a. Anmahni ang rual naupangte nen la hranglo a, ang khata enkawl an kalpui nasa a. Keinin la tlinve lo mah ila, keimahni tawk theuhah ri hriatna lama harsatna nei te, kan chhungkaw nunah, thenawm khawtlang leh Kohhran programme-te leh thianho inkawmnaah te a tam thei angber tel tirin telpui thin ila, nuam an tih ve mai bakah, nasa takin hma an sawn thei a, an rilru leh an nun a hlimin a hrisel phah sawt dawn a ni.
Pu Lal Thanzara chuan ri hriatna lama harsatna nei te hi rualbanlo enin en ringawt lo ila, midang ang chiaha thiam zawng leh tui zawng, nuam tih zawng leh chak zawng nei ve an ni tih hre thar theuh ila. An thiamna te hmang tangkaia an mahni ke ngeia an dinchhuah ve theih na’n kan hun leh tha te sengin, hriatthiamna thar leh hmangaihna thar nen vawiin atangin tanpuitu leh kaihruaitu nih tum theuh turin a chah a ni.
Health & Family Welfare Department hmalakna hrang hrang sawiin Minister chuan Aizawl Civil Hospital ah Private Cabin 6 awm belh tur thu te, Geriatic ( Kum upa) te tan Cabin 2 dah anih tur thu te, Kidney Dialysis Machine thar 2 neih belh anih thu leh a dang 2 pawh neih belh leh thuai anih tur thu te, Lunglei Civil Hospital-ah kum upa bik tan khum 10 awmna ward a hrana siam a nih thu te a sawi.
Vawiin inkhawm hi National Programme for Prevention and Control of Deafness (NPPCD) Health & Family Welfare Deptt. buatsaih a ni a. 2015 - 2016 kum chhung khan NPPCD outreach programme kaltlangin mi 14043 en an ni a. Mi 1376 bengri hriatna tha lo hmuhchhuah an ni.
World Day of the Deaf denchhen hian Dr. Eric Zomawia, State Nodal Officer, NPPCD; Dr. HC Laldina, ENT Surgeon; Zoramsiami, Audiologist, NPPCD leh C. Vanlalruati, Vice Principal, Gilead Special School ten presentation an pe a ni.
