Pu Lal Thanzara, Parliamentary Secy, MFA President ni bawk chuan vawiin khan Kolasib Diakkawn Field-ah Kolasib District Ist Inter Village Council Football Tournament a khar.

Kharna inkhawm Final match khelh hmaa neiha thu sawiin Pu Lal Thanzara chuan, Mizo thalai infiammite kawng hrang hranga an talent haichhuaha an thiamna tih hmasawnna turin sawrkar chuan a theih ang angin hma a la chho mek reng a. Kan Chief Minister Pu Lal Thanhawla leh Sports Minister te hmalaknain Artificial turf pawh Mizoram hmun pathumah kan nei ta a. Vawiina infiammi duhawm tak tak te hian Mizoram mai bak India ram pum huap khawpa hming chher turin sawrkarin hma a lak mek lai hian insum theihna nen  theihtawp chhuah hi in bat a ni, a ti. Tun hnaiah Mizo football player ten Sikkim ah leh Kohima-ah te chak ber nihna lallukhum an chang a, tunah Santosh Trophy-ah Quarter final an thleng leh ta mek bawk a.India Junior Team-ah player 7 thlan an ni bawk a. Mizote hi India ram chhung infiamna khawvelah kan duai lo hle a ni, a ti a. Player te chu tihtak zeta ruihtheih thil laka fihlima tan la turin a fuih a ni.

Pi Maria CT Zuali, Project Director pawhin thu sawiin, Mizote hi Sports ah kan san tawh hle laiin kan rilruah tih tak takna, teirei peihna kan neih a ngai a. India ramin Sikkimese tlangval, Bhaichung Bhutia chhuang taka a neih ang hi Mizo tlangval zingah kan invawrh chhuak thei a. Chumi tur chuan taksa tana tur hlauhawm Zu leh ruih theih thil dangah in thiar fihlim a ngai a ni, a ti a ni.

Pu Lalsangliana, President, Kolasib Town Zone Football Association chuan inkhawm hi a kaihruai a. Tournament hi, DRDA, Kolasib-in an sponsor a ni a, Kolasib khawchhung Village Council te bakah District chhung khaw hrang hrang atangin VC team 22 te an tel a ni. Vawiin hian Final hmuhnawm tak Kolasib Vengthar leh Vairengte team ten an khel a ni.