Pu Lal Thanzara, Parliamentary Secretary chuan, Government Kolasib College building chu reiloteah sak that a ni dawn ta a, College kawtzawl pawh zut mamsak (black top) a ni ang, a ti.

He thu hi vawina Govt. Kolasib College Week kharna, Diakkawn Hall-a neih a hmanpuinaah leh a hnua College building a tlawhnaah te a sawi a. College-a thawktute chu inlungrual taka hna thawk tlang tur leh zirlaite zirtirna kawnga thuk taka inpe thin turin a chah a ni.

College zirlaite chu an college kalchhunga an hun hmante tangkai taka hmang tura chahin tun huna in thil zir leh hriatte hi nakin huna in nun la hriltu tur a ni a, ram leh hnam tana mi tangkai leh hmantlak ni turin zir ang che u, a ti a. Finna hi zir zawh chi a ni lova, a taka nunpui a zir chhuah chi a ni a. Lehkha in zir bakah puitling nun in zir a ni tih inhre reng ang che u, a ti a ni. Extra Curricular activity pawimawhzia hi zirlaiten hre reng ang che u, tia chahin Pu Lal Thanzara chuan inelna chi hrang hrang tel hi mihring min chher puitlingtu a ni a. Chutih rualin inelna boruak thianghlim nei turin rilru zau tak nen chak leh chaklo nih dan pawh thiam a ngai a ni, a ti a. Delhi leh phai lama zirna hmunah tepawh Sports-a theite chu duhsak an ni fo thin a ni, a ti a ni.

Zirlaiten Politics thu kal lam leh haw lam pawh in chik ve fo a ngai a ni tih sawiin Sawrkarin zirna ti hmasawn turin leh ram dinhmun titha turin enge a tih tihte chik thin ang che u, a ti a. Amaherawhchu politics tui nu-ah erawh chuan in tal ve a rem lo a ni, a ti. Mizoram sawrkar chuan IT lamah nasa takin hma a la a. Phai lam zirna hmun thate pawh sawrkarin zirlaite ban phak ni turin kawng tinrengin tan a la a. Sports lamah pawh mizote kan invawrh sang tawhin tunah hian mizo tlangval rual 200 vel chu ram pawnah football khelin ei an zawng ta mek a ni, a ti a. Eng sawrkar mahin anla tih ngailoh mirethei eizawnna neilo te tan NLUP hmangin eizawnna ngelnghet siam a nita bawk a ni, Pu Lal Thanzara chuan a ti bawk a ni.

Pu R. Lalduhawma, Principal, GKC chuan thu sawiin tun dinhmunah zirlai 400 an neih thu te, teaching staff 78 an awm thu leh chung zinga 32 chu thawk nghet an nih tih a sawi a. An College chuan thawhhona boruak tha tak nen tluang takin hmalam an pan mek tih a sawi a ni.

College hmuna inkawmhonaah an mamawh hrang hrang College teacher ten an thlen a. Chhan tha tawk awm lova Lecturer te Aizawl lama sawn an niha an hmun hnawhkhah a ni leh thin lo leh chutih laia khawpui lam zirna In te staff an buk hle thin si chu hriatthiam har an tih thu leh Aizawl pawnlam College te hmakhua ngaia hei hi enfel tura sawrkar an duh thu an lo thlen a ni.