State Level Student’s Science Seminar vawi 32-na chu vawiin khan Vanapa Hall-ah neih a ni a; Education Minister Pu Lalsawta’n a hmanpui. Seminar hi Science Promotion Wing SCERT in buatsaih a; Seminar thupui chu ‘Mathematics in India – Past, Present and Future’ tih a ni.
Pu Lalsawta chuan tunlai zirnaah Science leh Mathematics a pawimawh zual tak zel avangin Mizoram pawhin khawvel hmasawn chho zel mila ke chheh kan siam rem a ngai tiin Zirtirtute pawh tun aia an zirlaite hemi kawnga fuih uar turin a chah bawk a ni. Minister hian Science leh Mathematics te hi subject har leh huphurhawm anga sawi fo thin, tih reh nan heng subject te hi hriatthiamna nena zir uar a tul thu a sawi a. Naupangin a zirlai a hriatthiam chuan nuam ti takin a zir thei a, thiam pawh a thiam awlsamin a thiamna pawh a nghet zawk a ni a ti.
Pu Lalsawta chuan Mizote tana pawimawh ber fo chu kan thil zir hian hmantlak mihringah min siam se tih hi a ni a ti a. Tunlai zirna sang zel mila Seminar te Science leh Mathematics hawi a inelna siam a tul thu a sawi bawk a ni. Zirlai kalkhawmte chu an zirlai ah te taimakna, tumruhna leh inpumpekna nen theihtawp chhuah turin a fuih bawk a ni.
Programme-ah hian Pi Malsawmthangi Director SCERT chuan inlawmna thu tawi a sawi a, Pu R.S.Chauhan Dy. Director SCERT chuan Report pe in Seminar kalpui a lo ni tawh dante te leh Seminar in a tum te a Report a tarlang bawk. He Seminar ah hian District Level a titha zirlai 13 te chuan Seminar thupui sawiin inelna an nei a, Written Test an neih bakah a endiktute (Judge) zawhna an chang tel bawk a ni. St.Paul’s HSS zirlai H.Lalnunziri chuan lawmman pakhatna a la; Malsawmzuala Royte St. Peter’s School Chhingchhip leh C. Ramdinpuii Baptist HSS Serkawn Lunglei te chuan lawmman pahnihna leh pathumna an la a ni.
Sikul sawmhnih chuang atangin zirlai thahnem takin Seminar hi an zirtirtute nen an chhim a. Seminar hi kum tin National Council of Science Museum (NCSM) leh Birla Industrial & Technological Museum (BITM) Kolkata te tangkawp chuan an buaipui thin a ni. State Level Seminar a pakhatna hian October ni 5 a BITM Kolkata a National Student’s Science Seminar-ah Mizoram ai an awh ang. Hun kalta khan Mizoram aiawhte chuan National Level a vawihnih lai lawmman an la tawh a ni.
Kumin hi India mi khawvel pawhin Mathematics a thiam avanga a ngaihsan em em Srinivas Ramanujam piancham vawi 125-na a ni a. Kumin hi Year of Mathematics a puan a nih bakah a pianni December ni 22 hi Sorkar Laipui chuan National Mathematics Day-ah a puang nghe nghe a ni.
