Vawiin khan Nepali mi ropui Adikavi Bhanu Bhakta Acharya piancham vawi 196-na Kolasib Tumpui Hall-ah lawm a ni a, Pu Lal Thanzara, Parliamentary Secretary chu khuallian niin a hmanpui.

Thu sawiin Pu Lal Thanzara chuan, Mizote leh Gurkha te hi chhul khat chhuak nilo mah ila kan khawsak hona a tha hle a ni, a ti a. Gurkha te chu chenpui nuam, unau tak tak anga kan en theih a ni, tiin kan in unauna hi i chhunzawm zel ang u, a ti. Gurkha te hi kum 1890 atang daih tawh a Mizoram lo luah tawh tute an ni, tiin tuna kum 1950 leh a hma lama Mizorama lo awm tawhte khua leh tuia chhiar an ni chu, tuna kan Chief Minister zahawm tak Pu Lal Thanhawla huna tih puitlin a ni, a ti. Tunhma British hunlai atang tawha Bangla sakah te Chowkidar hna thawhtir uar an nih thin thu tarlangin hei hi an hnam rinawm vang a ni, Pu Lal Thanzara chuan a ti a. Gurkha hnam chu India Danpui anga Other Backward Class (OBC) a an awm thu leh hei hi Mizoram sorkarin a pawmpui (declare/certify) phawt loh chuan hamthatna te an hmu thei lo tih a hnena an lo thlen chu a theih ang ang a lo bawhzui sak a tum tih a sawi bawk a. Pu Lal Thanzara chuan, sorkarah leh khawtlangah nihna pawimawh tak tak an hnamin an chelh chu lawmawm a tih thu sawiin, sorkar lai  kawng tinrenga thlawptu ni zel turin leh an harsatna leh mamawhte thlen hrehlo turin a chah a. A tul anga Mizoram Gurkha Youth Association (MGYA) Kolasib in an hman atan Computer set a pe a ni.

Pu B.S. Thapa, Lecturer, Govt. Kolasib College chuan thu sawiin, keini Gurkhali te hian Mizoram hi kan ramah nghet takin kan neih a, 1966 buaiah pawh chhuahsan duh lovin mi 20 bawr vel zet chu zalenna sualin an rammu a. State a hlankai alo nih khan Danpui in kan hnam chu OBC-a min rinluh tak avangin hun hma lamah hamthatna kan neihte kan nei thei ta lova. Tunah hian Mizoram state sorkarin OBC kan nihna min pawmpui sela chu ram leilung fate hamthatna (quota etc.) tibuai hauh lovin kan dikna/chanvo kan hmang ve thei ang, a ti a. Hemi atana tan lo lakpui turin khuallian chu a ngen a ni.

MGYA, Kolasib President Pu Dhrubaraj Thapa chuan inlawmna thu a sawi a. Bhanu Acharya chanchin leh a thu ziakte chhiar chhuah a ni a. Nepali hnam lam leh zai mawi tak takte entirin intihhlimna hun hman a ni a. Kolasib leh a chhehvel khaw hrang hranga Nepali hnam te Hall khat tlatin an kal a ni.

Bhanu Acharya hi Nepali hnam thu leh hla a sulsutu a ni a, sanskrit tawng atangin Nepali tawnga thu tamtak lettu a ni.