Vawiin khan Mizo Academy of Letters Jt.Hqrs Lunglei chuan an kum 40 tlinna (Ruby Jubilee) Saikuti Hall ah an lawm a, he huna khuallian Parliamentary Secretary Pu.Lal Thanzara chuan thu leh hla te thangthar lo awm zel ten an zirchian theih tura uluk zawka vawnthat na chang kan hriat zel a pawimawh a ni, a ti.

Khuallian Pu Lal Thanzara chuan MAL Jt.Hqrs Lunglei in kum 40 an tling chu a lawmpui thu sawiin thu leh hla lamah pawh nasa zawka mipuite zirtirna kawngah ke an pen a beisei thu a sawi. Mizo te hian thu leh hla a kan mithiam te sulhnu vawnthat na chang kan hre tawklo thina, kan thu ziak tha tak tak te pawh dahthat na chang kan hriat tawkloh avangin, thangthar zawk te tan haichhuah theih tawhlo tam tak a awm a ni a ti a, sawrkar ang pawhin file pawimawh tam tak chu enlet leh tlak mang loh leh enlet leh tur awm mumal lo a tam hle a chuvangin kan thuziak te vawnthat kawngah nasa zawka kan thanharh a tul hle a ni a ti bawk. Sawrkarin mipuite tana tha tur leh an mamawhna te phuhruk sak tuma ruahmanna tam tak a kalpui laia mi thenkhat ten an mahni hmakhua chauh ngaia sawrkar a lungawilohna lantir a a haw haw zawnga thil tih an ching thin chu vanduaithlak a tih thu Pu.Lal Thanzara hian a sawi a, sawrkar hmalakna leh ruahmanna siam te zirchianga ngaihchan thiam kan zir a pawimawh a ni ti bawkin Lunglei khawpui chei nan sawrkarin cheng vaibelchhe 4 a ruahman thu pawh a tarlang bawk a ni.

Vawiin a he hun hmanna MAL Jt.Hqrs President Pu.C. Hrangdula kaihhruai-ah hian Pu.Lalthangfala President MAL Hqrs Aizawl chu khualzahawm niin thu sawina hun a hmanga bawka, Ruby Jubilee puala MAL Jt.Hqrs Lehkhabu buatsaih "Kirirum" chu khuallian Pu.Lal Thanzara hian tlangzarhin, chawhnu lamah "Zohnahthlak tawng hrang hrangin min hnuhkhawm dan" tih thupui hmangin sawihona hun hman a ni bawk.