Pu Lal Thanzara I & PR Minister chuan vawiin khan Zo Re-Unification Organisation (ZORO) ten 9th Anniversary of UN Declaration of the Right of Indigenous Peoples inkhawm I & PR Auditorium a an buatsaih chu a hmanpui.

United Nation Organisation chuan khawvel ram 90 chunga Tualto hnam hrang hrang 5000 lai, mihring maktaduai 370 zette hi hnam lian zawk leh chak zawk tena an awp beh mekte chhanchhuah an nih theihna tur thuthlung, ‘ Declaration on the Right of Indigenous Peoples’ chu 13th September, 2007 khan a lo nemnghet tawh a. Vawiin Thuthlung nemnghehna champha, vawi 9 na chu ZORO hian a hmang a ni.

Pu Lal Thanzara chuan Mizo te hi Ethnic group khat, Zo Ethnic kan ni a. Zo Ethnic hian ethnic pahnih kan nei a, Tangible (hmuh theih, khawih theih, eg. Tawlh loh puan, puanchei) Intangible (hmuh theih loh, khawih theih loh, e.g tlawmgnaihna, rinawmna, huaisenna, etc) kan nei a ni tiin chu chu kan hnam nihna a ni a ti. Kan hnam identity hi a la nung reng a, Hnam atan Pathian in Mizo te min siam a, mizo kan ni mek a, kan ni kumkhua dawn a, kan vela hnam te hian min chim ral loha, keimahni duh thu ngeia kan hnam zia kan kalsan chuan remchanga hmangin hnamdang ho hian min chim ral thei a ni tiin Minister chuan kan hnamzia vawng nung reng tur chuan Mizo kan nihna, Mizoram leh kan Sakhua hi kan humhalh tlat a ngai a ni a ti. Hnam a min siamtu hian kan ram, hnam leh sakhua a thlawnin min pe a, hemi humhalh hi kan mawhphurhna leh kan tih tur diktak a ni tiin Minister chuan Zofate insuihkhawm anih theih nana hma la tute hi sawrkar hian a thlawp zel dawn a, theihtawp a chhuahpui zel bawk dawn a ni a ti.

Inkhawm hi Pu Laldova, Vice President, ZORO in a kaihruai a, Pu R.Sangkawia, President ZORO in thusawina hun neiin Pu F.Lalruatliana, General Secretary in report a pe bawk a ni.

Zo Re-Unification Organisation (ZORO) hi May 1988 kum khan din a ni a, an thuthlung chu - Zofa khawvela then darh zawng zawngte insuihkhawm leh a, rorelna pakhat hnuaia awm, tih a ni.