Ni 15 chhung awh tur lehkhabu hrang hrang chhawpchhuahna 7th Aizawl Book Fair chu vawiin khan Health Minister Pu Lal Thanzara’n Vanapa Hall-ah a hawng a, Book Fair hawnna programme hi MBSE President Rev. Dr. Lalchungnunga pawhin a hmanpui a ni.
Book Fair hawnna programme tawite Vanapa Hall-a neih ah Pu Lal Thanzara chuan ram changkang apiangin lehkhabu chhiar an ngaisangin an uar a tiin cable TV leh Internet avangin thalai tam tak ten lehkhabu chhiar nachang an hre ta lo chu pawi a tih thu a sawi. Engtikah mah TV leh Internet hian lehkhabu chhiar ai a awh theih loh tur thusawiin lehkhabu tha ngaihsan leh a chhiar nachang hriat a, uar hi thil pawimawh tak nia a hriat thu a sawi bawk.
Minister chuan Book Fair buatsaihtute chuan a nachang hria a, lehkhabu tha heti zat an chhawpchhuak thei chu lawmawm tiin nu leh pate leh zirtirtuten an fate leh an naupangte tlawhpui ngei turin a chah a. Kan naupang ten Chemtatrawta aiin Chhota Bheem an hre zawk ringawt pawh hian lehkhabu ngaihsan leh a chhiarna kawngah min ti tang tur a ni, a ti a. A mimal angte leh a hnam angte pawha lehkhabute hi hmasawnna hmanraw tangkai takah hman tum vek ang u, a ti bawk.
Aizawl Book Fair hi Pi Maggie L. Ralte leh Bookline Kolkata hotupa Pu Ramesh Tiwari te buatsaih a ni a, May ni 15 thleng a awh dawn a ni. Book Fair buaipuitute hian MJA Library atan lehkhabu an present bawk a ni.
