Pu Lal Thanzara, Health & Family Welfare Minister chuan vawiin khan Anti-Dengue Month bultanna I & PR Auditorium-a neih chu a hmanpui.
Minister chuan vawiin ah Dengue Do Thla bultanna kan hmang thei hi a lawmawm a, July thla hi Anti-Dengue Month a ni a, Dengue Do hna erawh chu July thla chauh lovah pawh a tul ang zelin thawh a ni zel dawn a ni, a ti. Kum 2012 atangin Mizoram-ah Dengue vei mi 14 hmuhchhuah an ni a, nunna chan lova tihdam vek an ni hi a lawmawmin sorkar hmalakna leh thawktute thawhrimnate, mipuite tawiawmnate nen kan tan tlan zel chuan he natna do hnaah hian hma kan sawnin kan hlawhtling thei ang, Pu Lal Thanzara chuan a ti a. Dengue chungchanga sorkar hmalakna hrang hrang - Sentinel Surveillance Hospital (SSH), Civil Hospital, Aizawl, ELISA Reader leh Washer dah a ni leh Awareness Campaign neih anih thu sawiin Minister chuan sorkar tanlakna bakah mipuite tawiawmna a tel loh chuan Dengue natna do kawngah hmasawnna leh hlawhtlinna a awm dawn lova, chuvangin, mipuiten kan phak tawk theuhah sorkar tawiawm turin a chah.
Minister chuan Dengue hi thosi seh atanga kai theih enkawlna damdawi bik awm lo, tihdam aia inven awlsam zawk a ni tiin mutnaa thosilen tha taka zar te, phal taka kan pindan DDT-a kahtir te, thosi hlo hman bakah thosi pian theihna tur tui tling siam loh a pawimawh thu sawiin, hretu mai ni lovin zawmtu nih theuh i tum ang u a ti. Inkhawm hi Dr K.Ropari, Principal Director, Health & Family Welfare-in a kaihruai a, Dr C.Zarzoliana, Jt. Director (Malaria)-in Dengue natna chungchang a sawi.
India rampumah kum 2010 khan Dengue natna vei mi 28,292 awmin mi 110-in nunna an chan a, kum 2013-ah Dengue natna vei mi 75,454 awmin mi 167-in nunna an chan a ni.
