Finance Minister Pu Lalsawta chu vawiin khan New Delhi ah Empowered Committee of State Finance Ministers meeting-ah a tel.

He meeting-ah hian Goods and Services Tax (GST) chungchang sawi ho a ni a. GST hi India rama chhiah lak dan tur siamthatna lian ber tur a ni a, amaherawhchu Constitution Amendment leh Provision tam tak siam that a ngaih avangin sawrkar laipui Term hmasaah khan kaltlangpui hman a ni ta lo a ni. GST hi hman a nih chuan India ram chhungah chhiah inang vek a lak a ni anga, hei hian ei leh bar bakah sumdawnna ah min phuar khawm tha hle dawn a ni. GST hnuaiah hian chhiah tih hniam a ni ang a, a lakna lam tihpun a ni thung ang.

GST hi hman a nih chuan India ram in kum khatah hlawkna US dollar 15 billion(USD tluklehdingawn 15) hmu tura beisei a ni a, India ram atanga thil thawnchhuah a ti tam anga, hna tam tak a siam belh bakah ei leh barah nasa takin ram a ti thang tura beisei a ni.

Vawiin ni vek hian Union Minister Pu Arun Jaitley hovin Sawrkar Budget leh sum leh pai lama hmathlir an sawi ho va. Union Minister chuan ei leh bar lama hmasawnna leh thil man sang zel inbuk tawka kal hi sawrkar ngaihpawimawh ber zing a mi a ni, a ti.

He meeting-ah hian Pi L.N. Tochhawng, Finance Commissioner leh Pu Lalthangliana Varte, Taxation Commissioner ten Pu Lalsawta hi an tawiawm.