Chief Minister Pu Lal Thanhawla chuan vawiin khan Aijal Club-ah Mizoram Civil Service Association (MCSA) General Conference vawi 39-na a hmanpui.

Chief Minister chuan Civil Service hi sorkar innghahna, sorkar hnuk an ti thin a, sorkar kahpathir ti te pawhin an sawi thin a ni a ti a. Hei hian sorkar hnarkaitu an nihzia a tilang chiang hle a ni a ti. Politician-te chu thinglera sava fu anga tehkhinin, ‘kan rawn awm a, kan kal bo leh mai thin’, tiin, ‘MCS te chu sorkar hnathawk, a nghet a awm in ni a, sorkar neitu dik tak in ni’, a ti a. Hmathlirte nei ve thin bawk mah ila a tihlawhtlingtu chu sorkar hnathawkte hi in ni a ti.

Chief Minister chuan sorkar hnthawkte chu an hna theuhah rinawm taka thawk tur an nih thu sawiin, ruling party ah rinawm tum tur an ni lo a ti a. Khawi hmunah pawh eng hna pawh thawk ila Pathianin a rawngbawl tura min dahna a ni a, chuvangin rinawmna, dikna, taimakna leh Amah tihna nen tui taka thawk tur kan ni tiin, midangte tana malsawmna ni turin ringtu kan nihna hi rim taka hmanga hna thawk tur kan ni a ti.

Mizote hi insawipui hnam kan ni a, transfer chungchangah leh kuttling lova sum lak tum manchhuahte thlenga insawipui thin kan nih vangin dikna lal tir tur chuan hengte hi kan tihreh a ngai a ni Pu Lal Thanhawla chuan a ti a. Kuttling lova sum lak luh duhna hian Mizoram hmasawnna tura project lian kan neih chhunte hi a thuanawp fo a ni tiin, tum nga (5) Chief Minister anih chhung hian pawisa pakhat pawh a eiruk loh thu a sawi a. Kan lakluh ang zela khawsak thiam kan zir a ngai a, sum kan lakluh piah lama khawsak tumna hian sualna hrang hrang a hring chhuak thei a, chuvangin sorkar hnathawkte chuan hei hi in ngaihtuah chian a pawimawh hle a ni a ti. Incheina lamte, etiquette leh protocol te ngaihpawimawh tul a tih thu sawi bawkin, technology thang chak takah hian MCS officer-te chu in update zel turin a fuih bawk a ni.

Chief Minister hian zu chungchang a sawiah, Mizote ang reng renga zu buaipui luai luai hi khawvel hnamdang zingah an vang khawpa a hriat thu a sawi a. A in thinte chuan buaipui bawk mahse a in lo te hlei hlei hian an buaipui emaw tih tur a ni a ti.

Chief Minister chuan sorkar langtlang, dik taka thawk leh mawhphurhna la ngam sorkar a awm theihna turin MCS officer-te chungah beiseina sang tak an neih thu sawiin, dik tak leh huaisen taka hna thawk theuh turin a chah a ni.

Conference hun hmasa hi MCSA Vice President Pu K.Laldingliana’n a kaihruai a, chawhnu lamah rorelna an nei chhunzawm a ni.

MCS Officer te hi tunah hian an vaiin 187 an awm mek a, Aizawl Districtah 90 awmin an tam ber a, Saiha districtah 8 awmin an tlemna ber a ni bawk. Hei bakah hian Mizoram pawn lamah 5 an awm mek bawk a ni.