State ramri chungchanga Mizoram leh Assam Sorkar inbiakna neih tur atana lo inbuatsaih lawk nan leh Mizoram tan chhan tur te ngaihtuah hovin vawiin chawhnu dar 1:00 khan Home Minister Pu R.Lalzirliana hovin New Secretariat Conference Hall ah meeting neih a ni a, meeting ah hian Political Party hrang hrang, tlawmngai pawl leh zirlai pawl aiawh te leh Home leh Land Revenue & Settlement Department hotu te an tel a ni.
Minister chuan State ramri chungchang chu mitin vei leh hnam pumpui thil a nih avanga Political Party leh tlawmngai pawl tin aiawh te sawma zau taka inrawn tul an tih thu a sawifiah a. Hun kalta lama ramri-a intihbuaina thleng thin chinfel nan Assam Sawrkar nen, tharum zawng nilova tha taka inremna siam tura Sawrkarin inbiakna neih a lo rawt tawh dan te a tarlang a. Tunhma Mizoram chanchin te, hun kalta lama Mizoram Sawrkarin ramri chungchanga hma a lo lak tawh dan te meeting ah chuan sawiho niin kalkhawm te chuan Assam Sawrkar nena inbiakna neih turah uluk taka inbuatsaiha documents leh lehkha pawimawh leh tul ang ang te kim taka khawn khawm ni se tiin an rel a. Chutianga a tul anga hma lo la turin Department kaihhnawih official te bakah political party leh tlawmngai pawl hrang hrang aiawh leh ramri chungchanga mi rawntlak te meeting chuan a ruat nghal bawk a ni.
Meeting-a tel member te chuan Mizoram ramri chungchang zau taka sawiho tura Home Minister-in pawl hrang hrang aiawh a sawm khawm chu lawmawm an tih thu sawiin lungrual taka hma lak chhoh zel ni se an duh thu an tarlang bawk.
