Information and Public Relations (I&PR) Department leh Mizoram Art Development Society (MADS) tangkawp chuan vawiin khan MADS Annual Art Exhibition 2017 chu Assembly House Annexe Building garage-ah an nei tan a. Exhibition hawnna inkhawmah hian I&PR Minister Pu Lal Thanzara chu khuallian a ni.

Pu Lal Thanzara chuan thiamna dang sports  leh eizawnna hrang hrangte ang bawkin sawrkar chuan Art hi a dah pawimawh a, chuvangin mi bik - painting/lemziak leh lemker (sculpture) hetiang lama thiamna neite tih hmasawnna hmanrua atan I&PR Department kaltlangin Art Development pual hian sum dah a ni, a ti. Lemziak, painting leh lemkerte hi mihring nun pholanga ngawi renga thu tam tak sawitu, ram hrang leh ram hrang inunauna thlen theitu, hnam ziarang pho chhuahna, ram leh hnam history pholangtu leh artist-te hming dai lova siam theitu a ni, a ti a. I&PR Minister chuan Mizoramah tih tak taka thawktu, lemziak leh lemker thiam mi heti zat an awm chu ropui tiin zirlai naupang zingah hetiang lama talent neite tana sulsutu leh cho chhuaktu ni se a duh thu a sawi bawk a ni.

MADS Vice President Pu Laltanpuia pawhin thusawiin sawrkar chuan Art hmasawnna turin nasa takin tan a la a, artist-te pawhin hei hi hriain chak taka hmasawn zel turin ke an pen a ngai, a ti a. Art exhibition an neih thin te hmang tangkai a, an thawhrimzia pholangtu ni thei se a duh tih sawiin an lemziak leh lem kerte chu belhchian dawl leh rintlak, nakin zela thangtharte tan pawha zir tlak khawp a ni angem tih ngaihtuah turin artist-te a fuih a ni.

MADS Annual Art Exhibition hi September ni 29 thleng zing dar 10 atanga tlai dar 5 chhungin a duh apiang tan tlawh theih a ni a, painting-te hi lei theih tura pho chhuah nghal a ni. MADS member sawmli rualin an kutchhuak an pholanga, painting 126 leh sculpture 6, a vaiin 132 phochhuah a ni. Hawnna inkhawm hi I&PR Director Pi Lalnithangi’n a kaihhruai a. Nodal Officer leh I&PR Joint Director Pi Lallianpuii’n lawmthu sawiin hawnna inkhawm hi tihtawp a ni.

 

 

Attachment

  • Loading attachment...