Tukin zing dar 7 khan Indian Society on Tobacco & Health Mizoram Chapter, Mizoram State Tobacco Control Society leh TATA Trust hnuaia Center for Microfinance and Livelihoods tangkawpin an buatsaih No Tobacco Rally chu Health Minister Pu Lal Thanzara’n Millenium Center kawtah a vailiam.
Health Minister Pu Lal Thanzara chuan thu sawiin ISTHM hmalaknaa No Tobacco Rally neih a ni chu lawmawm a tih thu a sawi a. Mihringten tum kan nei theuha, kan tuma hlawhtling tur chuan mahni inthununna (self-control) a pawimawh a ni, a ti a. Sports Association member lo kal khawmte hnenah chuan infiammi hlawhtling tak ni tur chuan zuk leh hmuam leh ruihtheihthila fihlim a pawimawh hmasak ber thu Pu Lal Thanzara chuan a sawi a. India rama zuk leh hmuam hluarna leh cancer natna vei tamna state kan ni chu pawi a tih thu sawiin vaihlo, zuk leh hmuam, hriselna nasa taka tichhetu sum leh pai khawhralna ni bawk chu kan do tur ani, a ti a. Minister chuan Mizo mipuite kan lo hrisel zawka kan ram a lo faia a thianghlim zel nan vaihlo, zuk leh hmuam, ruihtheihthil laka fihlima midangte tana entawntlak ni turin kalkhawmte chu a chah a ni.
No Tobacco Rally-ah hian ISTHM President Pi Lal Riliani chuan thu sawiin vaihlo ah hian taksa tichhe thei chemical 7000 chuang a awma hemi zinga 80 hi cancer thlen thei chi ani, a ti a. Thailaiten an thih phah hial vaihlo, gutkha leh a kaihhnawihte laka fihlim vek turin thalaite chu chahin anti- tobacco campaigner ni vek turin a chah nghal a ni.
He hunah hian Dr. Jane Ralte State Nodal Officer, Mizoram State Tobacco Contol Society pawhin thu sawiin vaihlo zuk leh hmuam in mihring chuap leh thisen zamte a tihchhiat dan te leh natna chi hrang hrang a thlen thin dan te sawifiahin, infiammi tan in fit tak tak tur chuan zuk leh hmuam laka fihlim a tul thu a sawi a. Pu C. Laltlanthanga Secretary, Mizoram State Sports Council, Pu Vanlalsawma Executive member ISTHM, Pu Lianngura Sailo Finance Secretary ISTHM leh Pu Partho Patwari Executive Director, Center for Microfinance and Livelihoods (TATA Trust) te pawhin thu an sawi bawk a ni.
No Tobacco Rally ah hian naupang, infiammi leh sports association member thahnem tak telin, Millenium Center Dawrpui atanga tanin Vanapa Hall thleng “No Tobacco” thuziak kengin an kal a. Vanapa Hall kawtah Rally kharna hun hman nghal a ni.
