Nimin ni 18.9.2017 khan Hualtu Village Council leh zirtirtute huathawtin Education Awareness Campaign buatsaih a ni a, Pu Lawmawma, District Education Officer Serchhip chuan khuallian niin a hmanpui.

Pu Lawmawma chuan zirnaah hian zirtirtu, nu leh pa, zirlai leh khawtlang hruaitute kan pawimawh vek a, kan tan tlan a tul a ni a ti a. Zirna hian tawp chin a nei lova, kan pian niah zirna kan tan a, kan thihin zirna a tawp chiah a, chuvangin zirtirtute pawh inzir reng tur kan ni a ti. Zirtirtute chu naupangte entawn tlaka zuk leh hmuam leh ruihhlo laka fihlim turin a chah a. Zirna in atanga 100 yard huam chhungah vaihlo leh a kaihhnawih lam thil zawrh khap tlat ani a, naupang kum 18 hnuai lamte chu vaihlo leh vaihlo atanga siam reng reng lei tura tirh phal anih loh thu leh an hnena hralh chu dan bawhchhiatna a nih thu a sawi bawk.

Thusawitu dang Pi Zoramchhani (State Awardee), Headmistress Chhiahtlang High School chuan zirtirtute hi naupang enkawl tura Pathianin a aiawha a dahte kan ni a, kan hna hi kan ngaipawimawh hle tur ani a ti.

He hunah hian Village Council member, zirtirtute, khawtlang hruaitute leh zirlaite an kal kim a ni.