Nizan khan Youth Hostel, Luangmualah Sustainable Mountain Development Summit (SMDS) VI hnuaia program pakhat “Youth Summit” hawnna neih a ni a. Planning & Program Implemenation Secretary, Dr. C. Vanlalramsanga chu Khuallian niin Summit hi Mizoram Sustainable Development Foundation ( MSDF) leh LEAD India tangkawp buatsaih a ni a. Summit thupui chu “Climate Change and Sustainable Mountain Cities” tih a ni. 

Khuallian Dr. Vanlalramsanga chuan ram leilung hausakna leh ram hmasawnna kan kalkawp tir thiam a tul thu a sawi a. Hemi kawngah hian thing leh mau ti chereu leh sik leh sa ti danglam theite chu enchian a ngaih thu a sawi a. Thalaite chu ram leilung venhim leh ngaihhlut kawngah kan thang harh a, hmala tu ber kan nih a ngai a ni, a ti a. Sustainable Mountain Development Summit-a tel state thalaite chu ram leilung pawh in ang tak tak leh sik leh sa inthlak chungchanga harsatna thuhmun tawk te an nih thu tarlangin inthurual leh inrawnkhawm chunga hma la turin a fuih a. Summit hlawhtling tak an neih theih nan duhsakna a hlan nghal bawk a ni. 

Youth Summit hi Ni 18-20 September 2017 chhunga neih tur niin Sustainable Mountain Development Summit (SMDS) VI Ni 20-22 September 2017-a Mizoram University a neih tur hnuaia programme pakhat a ni a. Himalaya bul thut state hrang hrang atangin palai 62 ‘Youth Summit ‘ chhim tur hian an rawn kal a ni. SMDS state hrang hrang te chu Jammu & Kashmir, Himachal Pradesh, Uttarakhand, Sikkim, Arunachal Pradesh, Nagaland, Manipur, Meghalaya, Mizoram , Tripura, West Bengal leh Assam-te an ni. Youth Summit-in a tum chu heng state-te ram leilung hausakna venhimna kawngah thalate’n tun aia nasa zawkin hna an thawk thei a ni tih hriattir a ni a. State hrang hrang hnam zia, thiamna leh finna te inzawmkhawm a, intichak tlang chunga hmalakna nei tura zirtirna ‘Youth Summit’-ah hian neih a ni dawn a ni. 

Hawnna programme hi President MSDF leh Convener SMDS VI Dr. Lalbiakmawia Ngente chuan a kaihruai a. Kalkhawmte lawmna thu MSDF Jt Secretary Dr. C.Rinawma chuan a sawi a. LEAD India atangin Radhika Kothari chuan summit chungchang sawina neiin State dang zirlaite thusawi, Summit atanga hlawkna an beiseinate ngaihthlak a ni bawk a. MSDF Secretary Dr. John Zothanzama chuan lawmthu sawina in hun a khar a ni.