Pu Lal Thanzara,, Health & Family Welfare Minister chuan vawiin khan Bethlehem Branch YMA Hall hawngin an Golden Jubilee lawmna inkhawm a hmanpui. Pu Vanlalzawma, MLA pawhin lawmna inkhawm hi a telpui.

Pu Lal Thanzara chuan hruaitute hma lakna in Bethlehem Veng chuan Assam Rifles ram dep a ngaw tha tak an siam a, Library tha leh changtlun an nei bawk chu lawmawm a tih thu sawiin Mizoten YMA kan nei bik hi kan vannei a hnam dangte pawhin min awt thin a ni a ti. YMA ah hian mi lian leh mi te thliar bik lovin a huang chhungah hian kan leng vek a, chhiatni thatni ah YMA te hmahruaitu kan nei thin hi a hlu in a thlamuan thlak a ni a ti. Central YMA hmalakna in ruihhlo te do thin a ni a, ruihhlo ngaite tan boot camp te buatsaih a nih thu sawi langin Minister chuan khawtlang nun siam thatna kawngah hian YMA hian hna nasa takin a thawk a ni a ti. YMA hi thil nawrtu pawl satliah (pressure group) ni lovin thil tha tihna turah chuan sorkar hi thurawn pe thin turin Minister chuan a chah in,Zonunmawi chhawm nung leh nan tan la thar theuh turin YMA member te chu Pu Lal Thanzara chuan a fuih a.

Pu Vanlalzawma, MLA chuan Golden Jubilee denchhen a Souvenir an buatsaih chu tlangzarh in YMA hi khawtlang tan a tangkaizia leh hlutzia a sawi lang a ni.

Bethlehem Branch YMA hi ni 24 March, 1964 a din a ni a, kumin March ni 24, 2-14 hi kum 50 tlin kum (Golden Jubilee) a ni a. Tun dinhmunah hian Bethlehem Branch YMA-ah hian member 1672 an awm mek a. Section pathum leh Sub-Committee 11 a awm bawk. Bethlehem Branch YMA hian YMA information centre, YMA Run, Library Building leh YMA Hall Building hran theuh an nei a. March ni 26, 2014 khan Golden Jubilee lawmna atan Thisen pek runpui neih a ni a, mi 96 in thisen hi an pe a.Tuna YMA Hall hawn tak sakna atan hian Rs. 73,75,488 hman a ni.