Vawiin khan Kahhrawt YMA Hall-ah Association for Voluntary Blood Donation Champhai Huaihawtin World Blood Donor day hman a ni a, he hun hi Dr Lalnuntluangi Khiangte District Medical Superintendent, President AVBD chuan a kaihruaia, Pu C.Zaihmingthanga Secretary chuan report pein, AVBD hi Champhai ah kum 2010-ah Dr. K.Ropari CMO ho a din a nih thu a sawi a, AVBD hnuaiah Blood Donation Awareness campaign neih thin a nih thu leh Tlawmngaipawl, Kohhran Thalai ten thisen an pek thin thu a sawi a, thisen pek hi sawrkar pawhin a ngaihpawimawh thu sawiin, thisen pe tur te chu chawlh an pek theih thu a sawi bawk. Kum 2013 April thla leh Kum 2014 March thla inkar khan Blood Bank ah thisen Unit 943, Mipa 770 leh hmeichhia 164 ten thisen an pe a, blood donation camp vawi 23 neih a ni a, blood donation Camp atangin mipa 410 leh hmeichhia 118 ten thisen an pe bawk tiin report ah chuan a tarlang.
Dr.Janet Zoremnghaki Blood Bank Officer pawhin thusawiin World Blood Donor day hi 2005 May thla atanga hman anih thu a sawi a, ui lova mahni thisen pe thintute avanga hmang thei an nih thu leh WHO in kum 2020 ah chuan 100% voluntary donation neih theih an tum thu a sawi bawk. Regular taka thisen pe thin te chu an hrisel thin thu sawiin, lung natna leh thau lutuk an tlem thu leh thlingin thisen thar a siam chhuah tam bik thu a sawi bawk a, kalkhawm te chu midangte tana athlawna thisen petu ni theuh turin a ngen bawk.
Dr. J.Lalramchhuanga pawhin thusawiin, Champhaiah thisen pe an tam hret hret thu sawiin, thisen mamawhna a sang zel a, chu mi phuhru tur chuan Champhai mipui kan pawimawh a, district dang an pawimawh lova a neitute kan pawimawh thu leh thisen pek chu a kristian a, a Pathian thu zia a sawi bawk. A thlawna thisen pe thin awmlo sela chuan nunna chan an tam tur thu sawiin, thisen kan pek hian nunna kan chhan a kan hriat miahlo hian mi chhungkaw hlimna kan thlen ani a ti bawk.
Vawiin a World Blood Donor Day hmanna ah hian kum 2013-2014 March thla inkara thisen pe tamte hnenah chawimawina thuziak hlan a ni a, Kohhran thalai pawl zingah thisen Unit 31 petu Ruantlang Branch KTP leh Adventist Youth Federation Champhai Branch te hnenah chawimawina thuziak hlan a ni a, Zirna in zingah Govt. Champhai College ten thisen pe tam berin Unit 57 an pe a, NGO zingah Hmunhmeltha Branch YMA te chuan thisen pe tam berin Unit 47 an pe a, Vanapa Section Tuipui Branch YMA chua Blood Donation Camp nei ngun berin vawi 2 an nei bawk a, chawimawina thuziak hlan an ni bawk. Champhai District chhungah Pu PC Lalchuangkima Bethel chuan thisen pe tam berin Unit 43 a pe tawh a, vawiin khan chawimawina hlan a ni bawk.
