Nimin khan Health & Family Welfare Department Minister Pu Lal Thanzara chuan Bangalore Mizo Association (BMA) buatsaih Vangpui Kut 2017 chu UTC Bangalore ah a hmanpui a. Kut a hmanpui hma in Minister hian Bangalore a, Banasawadi HR Br Layout a Mizoram House sakna tur hmun Bangalore Development Authority (BMA) in an ngaihtuahsak pawh a en bawk a ni.

Pu Lal Thanzara chuan India ram khawpui leh hmun hrang hrang a awm Zofate chu Mizoram leh kan hnam tan darthlalang pawimawh tak an nih thu a sawi a. Mizoram atangin hla takah hnam hrang hrang karah awm mah se, Zo nun Ze-mawi, a bik takin Tlawmngaihna an chawi nung zel thin chu ropui a tih thu te, Mizo infiamna te, hnam lam te leh Mizo tawnga intihsaikna an buatsaih te chuan BMA in hnam ziarang leh nihphung an hlutzia leh an dah pawimawhzia a tilang chiang hle a ni, a ti a.

Health Minister chuan Zoram pawna awm, a bik takin India ram khawpui lian a awm te’na Welfare leh Association an din chuan Zofate in pumkhatna leh in unauna a ti chakin a ti phuisui hle a, a ti a. Chin chang hriat loh avanga kawng hrang hranga harsatna tawk te an buaipui leh tanpui dan te, vanduaina tawh avanga nunna chante ruang an tuamhlawma an ruang an thawn chhoh dan te hi  Mizo tlawmngaihna dik tak lan chhuah tirna a ni tiin an hma lakna te chu ropui leh fakawm a tih thu a sawi a, hengte hi  ti-mit mai lova, chhawm nung zel turin BMA member te a chah a ni.

Bangalore-a lehkha zir mek leh hna thawka awm mek te he chu chhuantlak leh chhawrtlak, khawtlang leh ram tana malsawmna ni ngei turin, theihtawp chhuahin, an chhungte leh Mizoram tan malsawmna ni turin a fuih a. Khawvel thang chho mek leh khawpui lian ah te rilru la peng thei leh nun ti buai thei thil tha lo tam tak a awm thu sawiin chungte  laka fimkhur turin leh mahni inveng tlat turin BMA member te chu a chah bawk a ni.

BMA hi April ni 8, 1984 khan din niin Bangalore leh a chehvel a Mizo lehkha zir leh hnathawk a awm te uaptu pawl hlun ber a ni a, member 2000 chuang awmin Section 5 ah an inthen a ni.