Vawiin khan Synod Multipurpose Training Centre, Aizawlah Finance Minister Pu Lalsawta chuan Khawvel Upate Ni "International Day for Older Persons" puala Mission Vengthlang MUP Unit programme buatsaih a hmanpui. Khawvel Upate Ni hi October ni 1, Pathianni a nih avangin Mission Vengthlang MUP chuan vawiin hian a lawmna an buatsaih a ni.

Pu Lalsawta chuan Khawvel Upate Ni ah kalkhawmte chibai bukin upaten an hlutzia leh tangkaizia hriaa tawnhriat tam tak an neih tawh atanga thalaite finchhuah thin turin a chah a. Upa te chu khawtlang rohlu an ni a, anmahni tanpui leh ngaihsak chu kum lama naupang zawkte mawhphurhna a ni tiin an dam hun chawhnu her lam tawh pawh hlim takin kan siam thei a ni, Minister chuan a ti.

Khawvel Upate Ni hi United Nations chuan December 14, 1990 khan kum tin October ni 1 apianga hman thin turin a ruat a. India ramah chuan kum 1999 atang khan hman tan niin hemi kum atang hian Mizoramah pawh hman tan nghal a ni a. Tun dinhmunah khawvel ram 193 in he ni hi an hmang thin a ni. Upate Ni hi UNO chuan upate hamthatna, an mamawh leh harsatna midangte hriattir nan te, chhungkua leh khawtlanga kum lama upa zawk te hlutzia tarlan leh chawimawina hun atana duan a ni.

Upate Ni lawmna inkhawm Mission Vengthlang MUP President Pu Nghaklianmawia kaihhruaiah hian an veng chhunga kum 90 ralkai mi 14 hnenah chawimawina an hlan a. Chawimawina dawng zinga upa ber chu Pu Chalchhunga, kum 99 mi a ni. An veng chhunga senior officer tanglai mi 9 hnenah chawimawina hlan a ni bawk.