India Hnampa Pu Mahatma Gandhi piancham puala kumtin Faina Hapta neih thin chu tukin zing dar 8:00 AM khan AR Ground-ah UD&PA Minister Pu Zodintluanga chuan a hawng a; India rama state fai ber nih tuma sorkar hmalakna zing a mi kum khat chhung faina beihpui hmanna tur Action Plan for Cleanliness Year (2.10.2017 – 1.10.2018) chu a tlangzarh nghal a. He hunah hian khawpui fai inelna “Cleanliness Competition in Mizoram (Urban)” a fai ber thlanchhuah khuate hnenah khuallian hian lawmman a hlan bawk.

UD&PA Minister chuan UD&PA Department-in kum 1977 atanga Faina Hapta a hman tirh atangin vawiin chu a kum 40-na, Ruby Jubilee a nih thu sawiin, faina leh thianghlimna kawngah hma kan sawn hle nia a hriat thu a sawi a. Hnam leh ram changkanna tehfung pawimawh tak mai pakhat chu faina kawnga an dinhmun a nih thu sawiin, chumi avang chaun kum 1977 atanga Faina Hapta/ Cleanliness Week kum tin hman thin chu kuminah chuan a week mai duh tawk tawh lovin “Cleanliness Year” hman a nih dawn tak tur thu sawiin, Minister hian Cleanliness Year chu a hawng nghal a ni. He Cleanliness Year hian October 2, 2017 atanga October 1, 2018 thleng a huam ang a. He kum khat chhung hian faina kawngah nasa takin Mizoram dung leh vangah Sorkar-in kum khat daih tur action plan a duan hmangin hma lak a ni ang a; Sorkar chuan Kohhran leh zirlaite bakah NGO hrang hrangte tawiawmna a mamawh nasat tur thu a sawi a ni.

Minister Pu Zodintluanga chuan faina kawnga tan kan lak thar nan Sorkar-in kumina Khawfai Intihsiakna a buatsaih chu hlawhtling hle nia a hriat thu leh, faina kawnga Mizo inthurualzia a tilang a ni, a ti a. Hemi avang hian Mizoram urban area-ah chuan kum tin Khawfai Intihsiakna hi buatsaih chhunzawm zel a nih tur thu leh, nakum atan tun atanga khaw tinte lo inbuatsaih turin a chah nghal bawk a ni. Minister chuan Mizoram chu North East-ah ODF hmasa ber nih tuma hma lak mek laiin Sikkim-in min hmakhalh mah se, pahnihna ni turin tunah hian theihtawp chhuahin kan tang mek a, India ramah State fai ber nih kan tum a ni, a ti a. Hemi kawnga hmalakna atan a bul tan nan Mizoram Municipalities (3rd Amendment) Act, 2015-in a sawi angin Aizawl khawpui chu Littering Free Zone-ah puan a, khawlaia bawlhhlawh paihte chuan pawisa an chawi zel tawh dawn thu sawiin, he dan hi November, 2017 atanga kenkawh tan turin Aizawl Municipal Corporation pawh a inkau mek thu a tarlang a ni. Minister chuan Mizoram chu India state fai ber nih a tlin thu sawiin, chu dinhmun luah tur erawh chuan Sorkarah innghah ngawt a tawk loh thu leh, mi zawng zawngin he faina movement hi a neitu a an tan a ngaih thu a sawi a ni.

A vawi khatna atan kumin khaw fai inelna neihah hian Category hnih awmin, Category-I ah hian District Capital pariat te enfiah an ni a, Category-II ah hian Urban Town 15 te an inel thung a ni. Category-I a fai lawmman dawngtute chu a indawt danin 1.Mamit, 2.Lunglei, 3.Champhai, 4.Kolasib, 5.Siaha, 6.Serchhip, 7.Aizawl leh 8.Lawngtlai an ni a. Category-II hnuaia lawmman pek chu an fai dan indawtin: 1. Biate, 2.Hnahthial, 3.Saitual, 4.Lengpui, 5.Zawlnuam, 6.Sairang, 7.Kawnpui, 8.Khawhai, 9.Tlabung, 10.Khawzawl, 11.Darlawn, 12.N.Vanlaiphai, 13.Bairabi, 14.Vairengte, 15.Thenzawl an ni. Category I leh II a score lakkawpin Overall Ranking, Mizoram pum huap a fai ber thlan tel a ni bawk a, chutah chuan Biate chu pakhatna a ni a, Hnahthial leh Mamit in an dawt a ni.

Category I leh II ah hian lawmman pakhatna hian certificate leh pawisafai cheng nuai 1, pahnihna in certificate leh cheng sing nga, pathumna in certificate leh cheng sing thum an dawng a, a bak zawngin consolation prize certificate leh cheng sangnga an dawng thung. Overall a lawmman dawngtute hian certificate an dawng theuh bawk.

UD&PA Minister in a hawn tak Cleanliness Year hian October 2, 2017 atanga October 1, 2018 thleng a huam ang a. Action Plan zulzuiin hemi kum khat chhung hian kawng hrang hrangin khawpui fai siam tura hma lak tum a ni a. Chung zingah chuan kawr/ drain tihfai leh cheibawl te, mimal leh vantlang hmunah eh zirna in ah te inthiarna tha neih bakah vawn fai te, in tinin mahni bawlhhlawh paih hmaa tawih thei leh theilo thliar hran nachang hriat te, awareness campaign buatsaih te, vantlang bawlhhlawh bawm dah te leh bawlhhlawh sawngbawlna tha zawk siam te a huam tel a ni.

Vawiin programme hi Dr. C. Vanlalramsanga, UD&PA Secretary chuan kaihruaiin, Er.Lalrothanga, Convener, Panel of Experts for Cleanliness Competition leh SE(WATSAN) Aizawl, PHED ni bawk chuan khaw fai ber thlan a nih dan leh a endiktu Panel of Expert-te zinchhuah dan report a pe. Faina Hapta hawnna programme-ah hian AMC City Mayor leh Councillor-te bakah sorkar hnawthawkte leh khawfai intihsiaknaa khawtin aiawhte an tel a. NSS, NCC, Scout & Guide hruaitute leh volunteer-te tel bawkin, programme tan hma hian AR Ground leh a chhehvel thenfai hna an thawk a ni.