UD&PA Minister Pu Zodintluanga chuan Faina Hapta pualin vawiin khan New Secretariat Complex atangin Garbage Vehicle 54 a vai liam a, heng bawlhhlawh phur motor te hi Aizawl Municipal Corporation-ah hlan chhawn fel a ni ta a ni.

Minister Pu Zodintluanga chuan Faina beihpui (Cleanliness Drive) kan thlakna kal zel leh tanpuitu tangkai tak ni tur garbage vehicles flag-off theih a ni chu lawmawm a tih thu a sawi a. Mizoram chu India rama State fai ber ni tura Sawrkarin nasa taka tan a lak thu sawiin Minister chuan khawpuite an lo than len a, a chhunga chengte an pun chak tak hle avangin leh khawtlang a lo fai a, a lo hrisel zawk theih nan UD&PA Department chuan NEDP hnuaiah leh Central Sawrkar program hrang hrang atangin faina kawngah tan nasa taka a lak thu a sawi a. Minister chuan Aizawl khawpui hi Mizoram hmun hrang hrang bakah Mizoram pawn atang pawhin Zofate pem khawmna a nih avangin Aizawl khawpuiah tui in tur hrisel zawk, hnianghnar leh rualkhai zawka kan neihna tur te, kan zun leh ekthli te mumal taka luantir leh tihthiamghlimna tur te leh khawpui bawlhhlawh te mumal taka la khawm a, thianghlim taka tihralna tur te chu UD&PA Department chuan integrated projects buatsaihin hna a thawk mek a nih thu sawiin, he project hi North Eastern Region Capital Cities Development Investment Program (NERCCDIP) hnuaiah, Asian Development Bank (ADB) sum hmangin, Ministry of Housing & Urban Affairs (MoHUA), Government of India kal tlangin thawh mek a ni, a ti a.

Vawiina garbage vehicle inhlanna pawh hi faina kawnga hma sawn chhoh theih zelna atana rahbi thar niin bawlhlawhte mumal taka lak khawm leh awmze nei zawka sawngbawl a nih theih nan a “Solid Waste Resource Management for Aizawl City” sub-project hnuaiah kalpui a nih thu Minister hian a sawi a. Bawlhhlawh paina motor te chu Sorkarin enkawltu tura a ruat AMC chuan dimdawi leh uluk taka engkawl chungin tangkai taka hman a nih a beisei thu a sawi a ni.

Vawiin programme a khualzahawm, Aizawl City Mayor Pu Pu PC Lalhmingthanga chuan thu sawi bawkin, bawlhhlawh motor 54-te hi AMC hnena Mizoram Sorkarin a thilpek a nih piah lamah, Aizawl a cheng mitin tana Sorkar thilpek a nih thu a sawi a. Aizawl khawpui mihring nuai 3 sing 3 chuang chenna hi pem lut an awm zel avanga la thang chho mek zel a nih thu sawiin, a vawn fai  leh thianghlim mawh hi tu kut bik nilova, a tibaltu chu mihring bawk kan nih angin mitin hi khawpui fai siam turin kan pawimawh vek a ni, a ti.

Garbage Vehicle 54 vailiam te chu heng - Motor lian (TATA 407) sawmnga (50 nos.): bawlhhlawh tawihthei phur tur sawmhnih panga (25) leh tawihtheilo phur tur sawmhnih panga (25); bakah motor te (TATA Xenon) kawng zimlai leh harsa lai bik a hman tur pali (4) bawlhhlawh tawihthei phur tur pahnih (2 nos.) leh tawihtheilo phur tur pahnih (2 nos.)te an ni. Motor lian (TATA 407) pakhat hian bawlhhlawh 8 cubic meters a phur thei a, motor te (TATA Xenon) hian bawlhhlawh 3 cubic meters a phur thei dawn bawk a ni. Heng Garbage Vehicle 54-te a senso zawng zawng (chassis leina, body siamna leh chhiah pek tel vekin) chu Rs. 10,70,06,290 a ni.

Solid Waste Resource Management for Aizawl City project-in a tum pakhat chu bawlhhlawh siam tlem a ni a. Bawlhhlawh zingah pawh chuan hman nawn leh theih hman nawn bakah sum leh pai chang theite chu sum leh paia chantirna a ni dawn a ni. Hetianga mumal taka bawlhhlawh thliar hran leh sawngbawl a nih theih nan hian Aizawl khawpui chhunga in tinah inzirtirna pek hna pawh thawh chhoh mek zel a ni. Khawpuiah mihring cheng an pun chhoh zel avangin bawlhhlawhte mumal leh awmze nei zawka kan sawngbawl hi a tul ta takzet a. Chu chu hriain Sorkar chuan Aizawl khawpuiah ADB sum hmangin hma a la chho mup mup a: SIPMIU-in bawlhhlawh bawm hring leh pawl mipui hnena a sem pawh kha a hmanna tura bituk tawih thei leh tawih thei lo a thliar hranga dah zel tur a ni a. Chutianga bawlhhlawh thliar hrante chu vawiina motor 54 Aizawl khawpuia tlantir tur te hian a lakkhawm tur ni ruatah an khawn khawm thin dawn a ni. Mumal taka bawlhhlawh lak khawm a nih hunah chuan mumal taka sawngbawl zui a nih theih nan Tuirial Airfield bulah Solid Wastes Resource Centre hmun tur pawn chak taka ruahman chhoh niin, khuain a zir a harsatna dang a awm loh chuan nakum March, 2018-ah chuan peih fel hman beisei a ni.

Vawiin programme hi Dr. C. Vanlalramsanga, Secretary, UD&PA Department chuan kaihruaiin, Pu Lalringliana, Deputy Mayor, AMC leh Pu Valbuanga, Program Direcitr, SIPMIU (NERCCDIP) te chuan thu an sawi bawk a ni. He programme-ah hian Sawrkar Department hrang hrang Secretary te leh Head of Department te, AMC Councillor te, Aizawl khawpui chhunga Local Council te leh thuthar lakawhmtute an tel a ni.