Vawiin chawhma khan Aizawl Art Gallery-ah Pu Vanlalhriata buatsaih 3^rd Solo Painting Exhibition hawnna neih a ni a. He hunah hian PCCF, EF&CC Pu Lalram Thanga, IFS chu Khuallian niin I&PR Director, Pi Lalnithangi chu Khualzahawm a ni. Exhibition thupui chu ‘Ka suangtuahna Nungchate’ (My dreams of Wildlife) tih a ni a. I&PR Department leh Mizoram Art Development Society (MADS) bultum a ni.

Khuallian Pu Lalram Thanga, IFS chuan Mizote lemziak lamah hma kan sawn nasa a ni tiin hetiang lama hmasawn hi changkanna zia a ni, a ti a. Exhibition-a lemziakte hian nungchate hlutzia an tilang chiang hle a ni, a ti a. Wildlife week puala exhibition buatsaih a ni chu lawmawm a tih thu a sawi a. Nungchate laka kan rilru put hmang kan thlak a ngaih thu sawiin humhalh kawngah kan harhchhuah a tul a ni, a ti.

Khualzahawm Pi Lalnithangi chuan thusawiin solo exhibition buatsaih a ni chu lawmawm a tih thu a sawi a.  Kan ram rohlu phochhuahna hun tha a ni, a ti a. Mizoram Art Development Society (MADS) hmalakna avangin thalai ten lemziak an hlut bakah fine arts lama zirna sang zawk bel an tam phah a ni, a ti a. MADS bul tan dan leh an hmalaknate a tarlang a. Exhibition hian thangtharte tan hun tha a siam sak a ni tiin thalaite thil hmuh ngai lohte pawh lemziak hian a pholang a ni, a ti a. Exhibition chu mipuiin an hlut a beisei thu a sawi bawk a ni.

Hawnna hun hi  Association for Environmental Preservation (ASEP) President Pu K. Lalmuansanga’n a kaihruai a. Exhibition buatsaihtu Pu Vanlalhriata atangin thusawina ngaihthlak a ni a. Pu Vanlalhriata hian Khuallian, Khualzahawm leh Chairman hnenah a lemziakte a hlan nghal bawk a. EF&CC, ASEP, MADS leh I&PR hotute an tel a ni.

Pu Vanlalhriata hian solo exhibition kum 2014 leh 2015 khan a buatsaih tawh bakah group exhibitionah a tel thin a. Painting competition hrang hrangah 1-na a lo ni tawh a. Exhibitionah hian lemziak sawmthum chuang phochhuah a ni a.  October Ni 2 – 7, 2017 ( Zing Dar 9:30 atanga tlai 5:30) thleng tlawh theih a ni.