Health Minister Pu Lal Thanzara chuan vawin khan Edenthar Veng Community Complex lungphum a phum a, vengchhung Thlanmual kawng, Thlanmual In leh kawng siamthar dangte a hawng nghal.

Edenthar Community Complex hi cheng nuai 417 senga sak tur a ni .NECS-in a sak hna hi a thawk dawn a ni. Hall lungphum phumnaah hian Pu Lal Thanzara chuan sawrkar hmalakna hrang hrang tarlangin Mizoram sawrkar chuan hmasawnna kawngah mipui hnena a thutiam a hlen mek zel a ni a ti a. Hmasawnna kawngah Mizoram in hna a thawk nasa tih hi state pawn lam mi ten Mizoram an hmuhdan a ni a ti a. Edenthar khawtlangin rotling sawrkar hmalakna hrang hrang an dawng chu a lawmpui tih tarlangin a neitu thinlung putu  ni tur leh duat taka enkawltu an nih a ngai a ti a. Mipui ten sawrkar an thlawp chuan sawrkar a chak sawt zel tih sawiin sawrkar hmalakna ah mipui mawhphurhna a pawimawh tih thu a tarlang.

Hall lungphum phumna hi Edenthar Local Council chairman Pu G.Lalramzauva'n a kaihruai a. MLA fund hmanga sak Thlanmual In (RCC)hi cheng nuai 4 chuang senga sak a ni a, thlanmual kawngpui, 1 KM a thui, alkatra a luan, siam nan hian Cheng nuai 15 sen a ni a; Edenthar Vengchhung kawng, 110 metres (concrete pavement) siamnan pawh cheng nuai 15 tho sen a ni.