World Forestry Day hi March Ni 21- ah khawvel pumah hman thin a ni a. Kum 1971 Khan European Confederation of Agriculture-chuan mihring leh nungchate damkhawchhuah nan ramngaw a pawimawh zia leh khawvel sik leh sa inbuktawka siam tura a tangkai zia inzirtirna atan he ni hi a lo serh tawh a ni. World Forestry Day hi thupui(theme) nei a hman thin niin kuminah pawh thupui pawimawh tak Forest and Energy' tih chu thlan a ni. He thupui hian mihringte energy min petu pawimawh ber chu ramngaw a ni tih min zirtir a tum a ni. Tun dinhmuna khawvelin ramngaw tha a neih zawng zawng 2/3 vel hi heng ram-Canada, Russia, Brazil, USA, Congo, Australia, Indonesia, China, Peru leh India -ah te a awm a. Heng ramngaw tha kan la neihte avang hian khawvel hi mihringte tan chenna tlak a ni thei chauh a ni.
Ramngaw atanga kan hmuh thing(wood) hian khawvelin renewable energy a hmuh zawng zawng 40% vel min pe a. Energy kan hmuhna dang solar, hydro-electric leh wind power te aiin a let engemaw zatin a thawh hlawk a ni. Tin, tunah hian mihring maktaduai 883 zet chu thing leh a kaihhnawiha ei zawng mekte an ni. Ramngaw tel lova ecological balance a awm theih loh avangin, ramngaw tihchhiat hian buhbal thar a ti hlawk lo a, chu chuan khawvel economy a che zawngin a nghawng thin. Heng fossil fuel, hydropower etc te pawh hi ramngaw kan neih loh ve leha awm lo zui ve mai turte an ni a. Chuvangin ramngaw hi hun lokal tura khawvelin energy a mamawhte kan khawlkhawm theihna a ni a. Chu chuan hmasawnna tlo leh tluantling min thlen thei chauh dawn a ni.
Mizoramah hian ram hring (Green cover) kan la nei zau viau mai. Mahse ramngaw tha (virgin forest) erawh chu kan State zau zawng 0.65% (SFR 2015 published by FSI) emaw chauh kan nei tawh a. Ram kan enkawl that tawk loh avangin kan ramngaw thate a kiam zel a. Ramdang chauha thleng tura kan ngaih, ramngaw chereuin a nghawng thalo - tuihna tlem leh kangchat te,ruahtui tlak dan mumal lo te. khawlum chak lutuk te leh buhbal thar hlawk lo te pawh Mizoramah kan tawng chho ve ta zel a, a pawi hle a ni. Chuvangin kan chhehvel ramngawte duat ila, sawrkar,pawlho leh mimal thingphunte pawh humhalhin inzah sak ila,ram leh hmun awl kan neih apiangah thing phun uar lehzual ila, kan ram hi ram nuam zawkah kan siam thei dawn a ni.
