Parliamentary Secretary to Chief Minister Pu Lal Thanzara, Mizoram Football Association President ni bawk chuan vawiin khan Khawtetlang Playground, Serchhip-ah Lalsawmliani & Lal Thanchunga Memorial Football Running Trophy vawi 12-na a hawng.

Pu Lal Thanzara chuan infiamna lama thalaite tuihalna hria a Mizoram sorkarin hma a lak dan te tarlangin ram chhung State lian zawk thenkhat te neih ve loh khelmual pathumah phaitualhnim lem phah a ni chu lawmawm a tih thu leh infiammi te pawhin an chhawr tangkai ngei a beisei thu a sawi a. Olympic Games lo la awm leh turah pawh Mizo infiammite hming a lan ve ngei theihna tura theihtawp chhuaha Mizoram sorkarin tan a lak tur thu leh hemi bawhzui nan hian tunhnai mai khan thalkah lamah beihpui thlak tan a nih thu a tarlang bawk. Parliamentary Secretary chuan sorkarin hlemhletna dona kawngah tha a thlah dawnlo tih pawh sawiin tupawh kuttling lova sum la lut finfiah te chu hrem lohvin an chhuak lovang, a ti. MFA President Pu Lal Thanzara chuan a nu Pi Lalsawmliani leh a nau Lal Thanchhunga te hriatreng nana Serchhip District Football Association ten kum 12 chhung chatlak awm hauh lova Football Tournament an buatsaih thin chu lawmawm a tih thu sawiin he tournament a tel zawng zawng te duhsakna a hlan a ni.

MFA Sr. Vice President Pu P.C. Vanlalhruaia pawhin MFA hmalakna leh hmachhawp thenkhatte tarlangin FIFA Grassroot Football Academy dinna tur hmun atan Mizoram thlanchhuah a nih thu te, Australian pachal Chief Coach Scott O Daniel-a’n kumin October ni 15 hian Mizoram a rawn chuan chhuah tur thu leh October ni 15 atanga 19 chhunga Mizoram hmun hrang hranga Coach te hnenah training pek a nih tur thu a tarlang a. October ni 8 atanga ni 13 chhung hian All India Football Federation (AIFF) tirhin Refree Instructor-in training a rawn pek tur thu MFA Sr. Vice President hian a tarlang bawk.

Vawiina khelh tan Lalsawmliani & Lal Thanchhunga Memorial Football Club Running Trophy ah hian Mizoram hmun hrang hrang atangin Club 23 an tel a, an zingah hian Mizoram Premier League Club pali - Mizoram Police FC, Dinthar FC, Luangmual FC leh FC Kulikawn te pawh an tel a ni. Inkhel hmasa berah vawiin khan Champion lai Vengchung Football Club, Serchhip leh Ainawn Football Club, Hmunzawl te an inkhel a ni.