Transport Department hnuaia Driver leh Conductor te puala intuaihriamna hun ni hnih awh tur chu vawiin khan Chaltlang Transport Department Conference Hall-ah tan a ni.
He hun hmanpuitu Transport Minister Pu P.C. Zoram Sangliana chuan thu sawiin Transport Department a thawkte chu mipui tana thawktu an nih hre reng tur leh an hnathawhna ah Pathian hrereng turin a fuih a. Driver leh Conductor te chu danin a phut anga uniform ha thin tur leh taima taka an thawk thin turin a hrilh. Hrisel lohna avang leh ruihtheihthil avanga harsatna tawk, hnathawk thei lo thahnem tak an awm chu pawi a tih thu sawiin, intihluih kher ngai lova mahni dinhmun hria a inenfiah theuh turin a fuih a ni.
He hun a tel ve Transport Secretary Pu H. Darzika chuan mipui rawngbawl avanga man tlawm zawk a khualzin phur thin Transport Department te hian sorkar sum pai ah an thawh chhuah an chhun lut thin a, kum kalta chhung khan Cheng vaibelchhe 20.26 an tlin a ni a ti.
Intuaihriamna hun hawnna inkhawm kaihruaitu Transport Director Pu Thlamuana chuan thu hma a sawina ah Driver leh Conductor te chu an mi phurh te sahimna leh nawmsakna tur mawhphurtu an ni a, dan phal loh a meizial zu te man leh hrem tir thei tura thuneihna pek an nih thu a sawi lang.
Vawiin ah chuan Driver leh Conductor te mawhphurhna leh tihtur hrang hrang te, tangkai zawka mipui tana thawh dan tur chi hrang hrang bakah tunlaia khawl thar lo chhuak zel mila, tha leh tlo zawka motor enkawl dan tur thuziak buatsaih te ngaihthlak a ngun taka zir ho a ni a, hei bakah hian MST Bus te tun aia mipui tana him zawk leh tha zawka enkawl dan tur rawtna hrang hrang te tarlangin sawiho a ni bawk.
Naktuk ah chuan taksa hrisel lohna avang leh kawng dang avanga motor enkawl hlei theilo te tan a bika hun hman a ni dawn a. Hetah hian harsatna hrang hrang sutkian dan tur leh ruihtheih thil avanga mahni hna thawk thei lo te dan anga in enkawl dan leh awmze nei zawka chinfel dan tur te inhrilhin hmasawn tura infuih thar nan hun hman a ni ang.
