Lunglei District High Power Committee (HPC) chuan vawiin khan Chief Minister’s Office Conference room-ah Chairman Pu Lal Thanhawla, Chief Minister hovin meeting pawimawh tak an nei.

Meeting-ah hian thutkhawm hmasa a an thurel bawhzuina te ngaihthlakna neih a ni a. Chutah chuan Lungleia Kendriya Vidhyalaya Sangathan (KV School) chu a dinna hmun chungchanga a enkawltu thuneihna sang nei, Silchar atanga school tih tawp tura an tih chu HPC Chairman hmalakna a tih fel anih thu tarlan a ni a.College for Teachers Education dinna hmun tur enfiah mek anih thu te, Civil Hospital atana electric transformer dahna tura sum pek chhuah tawh anih chungchangte, State Botanical Park Saikhalha siam duhna chu Rs. 175.54 lakhs senso tur ARBORETUM zawk siam nise tihah 13th Finance Commission atanga Rs.52 lakhs dah anih thu te report a ni a. Hengte bakah hian Power supply changtlung zawk Lunglei district in a neihna turin Aizawl - Lunglei via Melriat 132 KV line siamna turin ruahmanna Rs. 47.37 Crore senso tur DoNER ah thehluh tawh anih thu tarlan a ni bawk a. Convention Centre Rs. 18.77 Crore senna tur kalpui mek anih thu te, Shopping Mall sak tum anih thu te leh HPC Office tur sak mek leh National Institute of Electronic & Information Technology (NIELIT) din tura hmalak mek anih thute tarlan a ni.

Meeting-ah hian agenda 7 chhawpchhuah a ni a. Chungte zingah chuan kum 2012-2013 chhunga sum ruahman Rs 6 Crore hmanna tur, sectoral allocation chu meeting-in a pawm a. Lunglei district-in chak zawka hmasawnna a neih theih nan state sorkarin sum a pek baka central ministries lama sum haichhuah anih theih nan Special development initiative for Lunglei District chu sawiho a ni a. 33 KV Sub Station bunna hmun tur pawh an sawiho a. HPC officea hna thawk tu 15 awm mek zingah Chief Planning Officer chu a nghet awmchhun anih avangin, technical leh ministerial staff lam tih changtlun nise an ti bawk a. Greater Lunglei Water Supply Scheme kum 1995 atanga hman tawh hian mipui mamawh a phuhruk zawh tawh loh avangin, Phase II ( Renewal and Augmentation ) siamna tura ruahmanna awm mek pawh sawiho a ni.Heng bakah hian Civil Hospital tih changtlun leh NIELIT Extension Centre, Lungleiah dah dan turte an sawiho bawk a ni.

Meeting ah hian member, non official tiamin an kal tha hle a. Lunglei a HPC hnathawh kaihhnawih head of office te chu an kal kim hle a ni.