Vawiin chawhma dar 10 atang khan Quarterly Review Meeting on NRHM, ni li awh tur chu Health Directorate Conference Hall-ah tan a ni.Health Minister Pu Lalrinliana Sailo chu khuallian a ni.
He meeting hi Director, Health Services Dr. Ramfangzauva’n a kaihruai a.He hunah hian NRHM hnuaia Health Programme hrang hrang ten hma an lak tawhna te thlirlet a. NRHM hnuai atang hian Sub-Centre, PHC Building tam tak sak a ni tawh a, building engemaw zat chei that a ni tawh bawk a. Mobile Medical Unit (MMU) hmangain thingtlang hmun kilkhawr zawkah man chawi lovin inentirna neih a ni a, natna hrang hrang hmuhchhuah a ni bawk a ni. RCH programme hnuaiah nau piang tir thihna leh nu nau chunga thihna nasa takin tihhniam a ni tawh bawk a ni. Immunization Programme atangin Routine Immunization (naupang hri danna) pek thin a ni bawk a, kum 2011 December thla atang khan Hepatitis B vaccine pawh Sub-Centre tin atangin pek thin a ni bawk.
Minister chuan Health Department hnuaia Programme officer te report pek chu tha a tih thu sawiin, report pek leh hunah chuan hmasawnna lam report tun aia nasa zawka pe thei tura tan la turin a fuih a. Tun hnaia Mizoram Health Services in Award a dawn theihna chhan pawh thahnemngaih taka thawktute tanrualna a ni tih tarlangin amah ngei pawhin a Department enkawlte chu englai pawha a rilru kap tu ber a nih thin thu a sawi. Pu Lalrinliana Sailo chuan Chief Medical Officer te chu anmahni bial theuh hre bel tur leh road map siam a, Sub-Centre leh Clinic Centre awm lohna khua te report vek turin a chah bawk. “Award kan dawn avanga Central in min beiseina aia tlakhniam leh a thiang tawh lova, kan thlen chin atanga hmasawn zel tur kan ni”, Minister chuan a ti.
Vawiin inkhawm ah hian Lawngtlai Lai ram Hospital, Durtlang Presbyterian Hospital, 7th Day Adventist Hospital leh Hope Hospital, Lunglei te hnenah Microscope pakhat theuh Minister hian a hlan a ni.
He review meeting ah hian District tin atangin Chief Medical Officer, Senior Medical Officer leh Health Directorate a Programme Officer an tel kim hle.
