Parliamentary Secretary Pu Lal Thanzara chuan, \" zirlaiten kawng chi hrang hrangah thiamna an neih theihna turin sawrkar chuan chak takin hma a la mek a ni \", a ti.

Vawiina Chanmari YMA hall a Govt. Aizawl College week kharna hmanpuiin, Pu lal Thanzara chuan zirlai ten kawng chi hrang hranga hma an sawn theih nan hian tun dinhmunah Industrial Training Institute chu Saiha ah hawn tura ruahman mek a ni tih a sawi a, Polytechnic zirna pawh Serchhip leh Saiha ah hawn turin sawrkar laipui chuan phalna a pe tawh a ni a ti a. Heng bakah hian Chhingchhip ah Sainik School tur atan chak taka hmalak mek anih thu leh NIIT, NIT leh IIMC te pawh kalpui mek a ni tawh tih a sawi bawk.

Pu Lal Thanzara chuan Zirlaite chu Politics kalphung hrethiam tura chahin,\"Zirlaiten ram Politics a thu kal lam leh haw lam hre tura an intuai hriam a ngai a, hetih rual hian Zirlai nih laia Politics a inhnimphum lo turin Zirlai kalkhawmte hi ka chah duh che u a ni\" a ti. Zirlai Pawl ah in hman a pawimawh rualin, mahni tana hamthatna zawnga pawl kaihruai an awm thin tih sawiin, Mahni zirlai puite kaihbu-a tanga hruai penna awm thin chu thil thalo tak a ni tih a sawi a, zirlaite hamthatna ngaihtuahtu hruaitute chu ramin a mamawh an nih thu leh inthlahdah lova mar pata mahni zirna ngaihpawimawh chu zirlaite tih makmawk a ni tih a sawi a ni.

Govt Aizawl College week vawi 19 na kharna ah hian chawhma lamah an Principal Dr. Laithanzauva chuan zirlaite tan thuchah a sawiin, Student Union hruaitute Report hrang hrang an pe a, chawhnu lamah intihhlimna hun leh Advance Chrismas programme an hmang a ni.