Ni thum awh Awithangpa Group YMA Conference Hmarlutvung Run, Mualvum a hman chu nizan khan tiakin, Pu Lal Thanzara, Minister H&FW, I&PR etc. chuan Khuallian niin a hmanpui.

A tiak zan vantlang inkhawmah hian Khuallian chuan YMA chu mizo nunze mawi vawng nungtu, chhiatni thatni a min tuam hlawmtu, milian leh mite thliar ngailo, kohhran leh political party ramri khamin a dal ngailoh, Ram leh Hnam kawng hrang hranga humhalhtu leh sorkar finchhuaha thawhpuitu a nih thu a sawi a. Mizo ten YMA nei ta lo ila, kan khawtlang nun chu ngaihtuah thiam phak a ni lo a ti a. Minister chuan YMA member te nun vawn thianghlim kawngah  tan lak a ngai a, zuk leh hmuam, ruitheihthil leh mipat hmeichhiat hmansual lakah kan invawn a ngai a ni tiin, insum theihna leh nun vawn thianghlimna hi a YMA mai nilo in a Kristian a ni a ti a. Ram leh hnam humhalh kalpuinaah pawh thing leh mau humhalh te, ram kang tur vente leh nungcha humhalh te hi tih tur pawimawh tak a ni a ti a. YMA hi intihchangkan san chi a nilo tiin, mizo nunze mawi;Aia Upa zah, tlawmngaihna leh nu leh pa zah te chhawm nung zel turin kalkhawmte a sawm a ni.

Vantlang inkhawm hi Pu C.Lalnuntluanga, Treasurer Awithangpa Group YMA in kaihruaiin, Pu HL Thangzuala, Commandant 1st IR Bn, Pu Lalhmingliana, Kawnpui SDO(C) leh DIPRO, Kolasib ten an hmanpui bawk a ni. Inkhawmah hian kum 2016 chhunga YMA Branch hnathawk tha te hnenah lawmman hlan a ni a. Conference hi ‘Ram leh Hnam Humhalh’ tih thupui hmangin neih a ni a, conference chhung hian rorel inkhawm bakah Ram kang tur venhim chungchang leh HIV/AIDS chungchang inzirtirna neih a ni.

Awithangpa Group YMA ah hian YMA branch 13 awmin kum 2016 khan member 5035 an awm a ni.