Pu Lal Thanzara, Parliamentary Secretary to Chief Minister chuan vawiin khan chanchinbu mite tana hamthatna tura buatsaih Journalists Welfare Fund chu mi 9 hnenah a sem. Semna inkhawm Aizawl Press Club-a neih hi Pu Jim K.Chozah, Director, Information &Public Relations-in a kaihruai a. Pu C.Thatkunga, Secretary, Information & Public Relations leh Chairman, Mizoram Jounalists Welfare Society chu Special Invitee a ni.

Pu Lal Thanzara chuan ram leh hnam tana kan rawngbawlpui thin member kaltate leh harsatna tawk mek te tanpuina atana MJA – ten ruahmanna an siam Dr R.Lalthangliana’n a lo tihhlawhtlinsak tawh leh I&PR Minister hmasa Pu Zodintluanga’n MJA Welfare Fund zau zawka hman theih tura ruahmanna a lo siam chu lawmawm a tih thu a sawi. Parliamentary Secretary chuan MJA-in sorkara ngenna an siam angin Journalists Welfare Fund chu Finance Minister hmalakna angin tihpun anih tur thu sawiin, sorkar hian chanchinbu lian chauh ni lovin chanchinbu te te pawh dawmkana enkawl zel a tum thu a sawi bawk a ni.

Pu Lal Thanzara chuan Chief Guest nih hi an chak vanga va dil an ni lova, sorkarin mipuite tana a hmachhawp leh a hnathawh va pholanna remchang anih avanga heng hun hmang an ni; mi thenkhatten sorkar hna tibahlah khawpa chief guest nih chaka inpuhna hi thudik tluantling lovah a ngaih thu chanchinbumi kalkhawmte hmaah a sawi a. A sawi zelnaah Pu Lal Thanzara chuan mipui rawngbawltu an nih angin mipuite nen an inhmuh tamna remchang ni-ah a ngaih thu a sawi bawk.

He inkhawmah hian khuallian chuan Pu K.Lalhruaitluanga, Editor, Khawpui Aw April ni 17, 2013-a boral ta chhungte hnenah Ex-Gratia cheng nuai khat a hlan a; midang 8 natna khirh taka damlo hnenah tanpuina a hlan bawk.