Vawiin chawhma dar 11:30 khan Pu Lalkhama IAS (rtd.), State Planning Board Vice Chairman chuan Serchhip ah Economic & Statistics Department Office thar a hawng.

Hawnna thusawitu State Planning Board Vice Chairman chuan, mizote zingah Statistics aia thildang pawimawh zawk a ngai, Statistics chu a ve mai mai a ngai kan la tam tih thu a sawi a, Statistics hi ram hmasawnna hnuk a ni a, data leh information chi hrang hrang lakkhawm behchhanin ram hmasawnna tura hmachhawp (development plan) duan thin a ni a, Statistics hi ramhmasawnna hnathawh (developmental works) innghahna bulpui tak chu a ni a ti bawk. Ram rorelna chungchangah pawh information leh statistical data neih that a, chumi hman tangkai thiam chu thil pawimawh ber anih thu a sawi a, Statistical data hmanga information hrang hrang kan neih te hi kan ram himna tura hmalak dan tur kawng hrang hrang kawhhmuh tu atana kan hman tangkai a pawimawh a ni a ti bawk.

Thusawitu dang Serchhip District Bawrhsap, Pi Juhi Mukherjee IAS pawhin District hmasa ho - Aizawl, Lunglei leh Saiha tih loh a Economic & Statistics Office din hmasakna ber District an ni chu lawmawm a tih thu leh hemi atana hma latu te thahnemngaihna ah lawmthu a sawi a, Serchhip District hi a zau lova, mihring pawh an tlem a, hmasawnna hnathawh pawh ruahmanna mumal tak a awm chuan harsa lova thawh a phurawm hle a ni a ti a, Economics & Statistics Department in a thutchilh ve dawn tak phei chuan chak lehzuala hmasawnna hna thawh anih theih ngei a beisei thu leh hemi atana tan lak nasat leh zual a tum thu a sawi bawk a ni.

Economics & Statistics Office hian tunah hian Pu V. Thanhranga In, Serchhip AOC veng ami chu an luah mek a, an office hmun tur pawh sawrkarin a ruahman fel sak tawh a, remchang hmasa berah Office building sak hna hi tan ani dawn a ni.

Pu Saihlira, Director, Economics & Statistics chuan Statistics hian tun dinhmunah eng nge kan nih ? englai hi nge zir bing ngai a, khawi lai hi nge kan than lehzualna tur atana ngaihpawimawh zual ngai tih te min hriatchian tir thin avangin a pawimawh em em a, hemi atana data an lakkhawm dawn in mi thenkhat chuan an ngaihpawimawh sak tawk lo thin a, hei hian harsatna tam tak a siam thin niin a sawi a, Sawrkar department hrang hrang te pawh an information leh data te ram hmasawnna tarlanna leh kalzelna atana pawimawh anih vangin phal takin in hriattir tlan thin ni se a duh thu a sawi bawk.

Vawiin Office hawn anih rual hian Statistical Awareness Programme buatsaih ani nghal a, he hun hi Pu Lalrikhuma Sailo, Joint Director, Economics & Statistics in a kaihruai a, Statistical System leh thil pawimawh chi hrang hrang a sawi hnu a inkawmkhawmna hun benglut tak an hmang a ni.

Serchhip District Economics & Statistics Office hi Pu C. Liantluanga, District Research Officer leh a thawhpui staff pali ten an enkawl dawn a, hnathawh bul tan anih dawn avang leh Serchhip District chuAizawl District hnuai atanga lak hran anih tak avangin District chhunga data leh information chi hrang hrangte chinfel hmasak ngai a tam dawn a, Register of Birth & Death leh thildang chi hrang hrang a NAC te pawh tun dinhmunah chuan chinfel ngai a la tam rih avangin an buaipui nghal thei rih dawn lova, mipuiten an harsatna hrethiam turin an ngen a, a rang thei ang ber a, mipuite’n an duh tawka an dawr theih turin tan an lak dawn thu an sawi a ni.

Vawiin Economics & Statistics Office hawnna inkhawm hi Pu Saihlira, Director, Economics & Statistics in a kaihruai a, Serchhip Bawrhsap, Superintendent of Police leh Serchhip a Sawrkar pisa hrang hrang enkawltu te bakah khawtlang mi challangte an tel kim hle a ni.