Vawiin chawhma dar 11.00 khan Parliamentary Secretary Pu Lal Thanzara chuan Khatla South MHIP Branch-in MHIP Day vawi 38-na lawmna inkhawm YMA Hall-a an buatsaih chu a hmanpui.

Pu Lal Thanzara chuan Mizoram-in mi zawng zawng huapzo tlawmngai pawl kan nei chu vanneihthlak a tih thu leh khawtlang min phuarkhawmtu a nih thu a sawi a. “MHIP Day-ah hian MHIP headquarters te leh Branch tin ten sawrkar ruahmannate min tawiawm thin avang te, sawrkarin phungbawma kan sawm apianga tha taka min thawhpui thin avangin sawrkar aiawhin lawmthu ka sawi a ni” a ti. Hman lai leh tun lai huna Mizo hmeichhiate dinhmun a tha zawnga a inher danglam nasa ta chu Mizo hnam changkan tawhzia tilangtu a nih thu Pu Lal Thanzara chuan sawiin, “Mizo hmeichhiaten pisa hna-ah te, eizawnna kawng hrang hrangah leh ram leh hnam tana hnathawhna kawngah mipate dinhmun kan tluk thial tawh a; hengte hi MHIP-te hmalakna rah pakhat a ni” a ti. Khawtlang nun siamthatna kawngah leh ruihhlo, zuk leh hmuam leh suahsualna chi hrang hrang do-na kawnga nu-te mawhphurhna sanzia thu sawiin Pu Lal Thanzara chuan, “Kristian chhungkaw din hi chhungkhat nu kovah a innghat thui hle a; kan tu leh fate tan mahni in lumah hun kan hman tam lehzual a pawimawh a ni. Hmeichhe khawsak tha chu a pasal tan lunghlu sen aia a hlut zawk thu te, a pasal thinlungin a rin zawhzia te Bible-in min kawhhmuh a. Chuvang chuan vawiin MHIP Day hi keimahni chhungkaw tan leh khawtlang tana inhlan tharna ni-ah i hmang ang u” a ti.

Khatla South MHIP Branch hian ni lengin MHIP Day hi an lawm a; zai leh lam bakah infiamna hmanga intihlimna hun an buatsaih a; tlai-ah MHIP Day pualin ruai an buatsaih a ni. Parliamentary Secretary Pu Lal Thanzara hian Khatla South MHIP chu poly-tarpouline leh ei siam dan bu a present a ni. Vawiina Khatla South MHIP Day hmanna hi an President Pi Lalduhawmi’n a kaihruai a ni.