Vawiin zing dar 10.00 khan Academy of Integrated Christian Studies (AICS) buatsaihin I&PR Conference Hall-ah Mizoram-a pawngsual pung deuh deuh ni-a lang leh a ven dan chungchangah ni khat awh seminar neih a ni a; he hun hi Pu Lal Thanzara, Parliamentary Secretary chuan a hmanpui a ni.
Pu Lal Thanzara chuan, “Mizoram-ah hnam ang leh Kristian kan nihna anga kan hmingchhiatna tur pawngsual a thleng fo hi a vanduaithlak a; tun hma kha chuan heng pawikhawihna tam zawk hi pawnlam mite thiltih a ni ber a, tuna keimahni Mizo ngei inkara hetiang suahsualna a lo thleng thin hi a ngaihmawhawm tak meuh a ni” a ti. Khawvel changkannain a ken tel cell-phone te, internet leh television te chu hman khawloh a nih chuan nasa taka chhiatpui theih a nih thu sawiin Pu Lal Thanzara chuan, “Nu leh paten tun hma zawng aiin kan tu leh fate kan vil uluk a ngai tawh a, film thalo leh zahmawh rawngkai thilah te phei chuan kan thlithlai ngunin, kan thikthu kan tihchhiat a tul em em tawh a ni” a ti bawk. Pawngsual tawkte harsatna chu an thil tawn rapthlak takah a tawp mai loh avanga anmahni tuamhlawm leh enkawl dam kawngah tanrual a ngaihthu pawh Pu Lal Thanzara chuan sawiin, “Pawngsual tawkte vanduaina hian an dam chhung nun a nghawng thin avangin kohhran leh khawtlangin anmahni dawnsawn dan te, tuamhlawm dan leh enkawl dante kan zir a, hemi kawnga tan kan lak thar a tul hle a ni” a ti. Mizoram sawrkarin pawngsual chungchang leh naupang kum-tlinglote chunga hleilenna chi hrang hrangte a ngaimawh thu leh hemi chungchangah hian Chief Minister Pu Lal Thanhawla hovin NGO leh kohhrante nena inbiakrawn a nih tawh thu a sawi a. “He inrawnkhawmna a thil rawtte chu tihhlawhtlin a nih ngei theihna turin chak taka bawhzui a ni ang” Pu Lal Thanzara chuan a ti bawk.
Vawiina AICS buatsaiha seminar-ah hian mithiam sawm bik mi panga ; Nl. C. Lalthansangi, Counsellor, Centre for Peace & Development te; Dr. HTC Lalrinchhana, Sr. Civil Judge te, Dr. Lalrindiki Ralte, Associate Professor, Aizawl Theological College te, Rev. C. Vanlaldika, Lecturer, AICS leh Rev. R. Zolawma, Lecturer AICS te paper buatsaih chu zirho a ni a. Inkhawm hi Rev. Dr. K. Thanzauva, Professor AICS chuan a kaihruai a; chawhnu lama seminar thupui sawihona chu Rev. Dr. R.L. Hnuni, Principal AICS chuan a kaihruai a ni.
