Mizoram Chief Information Commissioner Pu Lal Dingliana, IFS(Rtd) chuan nizan (5/7/12) khan Rotary Club of Aizawl hruaitute dahnghehna (Installation of Office Bearers) vawi 21-na chu Aijal Club ah a hmanpui.

Khuallian Pu Lal Dingliana chuan thusawiin ram hrang hranga a lo thawh tawhna atanga Rotary Club a lo hmelhriat tawh thu leh midang tana an hmalakna te ropui a tih thin thu te a tarlang a. Khawvel puma zeng hri danna kawnga an hmalakna ropui tak avanga United Nations pawhin thawhpuia a hman hial thu te a chhuanawmzia a sawi lang bawk. Khawtlang tana rawngbawlna ah dik leh diklo thliar hrana, hlemhletna umbo kawngah te mimal tinin tih theih tawk kan nei theuh a ni tih hriaa, nunhona boruak tha leh hrisel siama vawng nung tlat tura tan la theuh turin kalkhawmte chu a sawm bawk. Right to Information chu hlemhletna dona hmanrua tangkai tak a nih thu sawiin mitinin kan zirchian a, khawtlang hamthatna tura chhawr tangkai tura hma la theuh turin a chah bawk.

Rotary Club of Aizawl 21st Installation programme hi President kalchhuak Rtn Lalrimawii Khiangte-in a kaihruai a, President thar Rtn. Dr Saingura Sailo leh Office Bearers dangte dahnghehna hun hman a nih bakah khawtlang tana hna thawk tha thlanchhuahte - SHALOM, AizawlA dventist Hospital, Dr R.L.Sanghluna leh Pu Zoliana Royte te hnenah chawimawina hlan an ni bawk.

Rotary Club of Aizawl hian kawng hrang hrangin midang tana rawngbawl hna an thawk thin a, Tailoring Project hnuaiah Central Jail-a hmeichhe tangte, an chhuah hnua mahni kea an din theih nan puanthui an zirtir thin a, hnuchhamte hnenah tanpuina an pe a, North Sikkim lirnghing tuartute hnenah tanpuina an pe a, kutke neilo tan Artificial Limb Camp nei turin hma an la mek a, mi 32 hnena sem turin an peih tep tawh a ni. Rotary Peace Fellowship hnuaiah Research Fellowship,khawvel University hrang hrang ah a thlawnin zirlai an tir thin bawk a ni.