Mizoram Chhim lama thang mek Parliamentary Secretary Pu S.Laldingliana chuan nimin July ni 4, 2012 (Nilaini) khan Khawmawi-ah damlo mangangte tan a thlawna inentirna hun (Free Medical Camp) a buatsaih sak. Khawmawi hi khaw kilkhawr ve tak a nih avangin damlo inentirna kawngah harsatna an tawk nasa hle a. Fur laite a nih avangin Malaria leh natna hrang hrang avangin khaw mipuiten harsatna hrang hrang an tawk nasa hle a. Hetiang a nih avang hian khawpui pan thei lo damlote tan a thlawnin inentirna hi buatsaih a ni ta a ni. He Free Medical camp ah hian damlo mi 176 lai an inentir a. Damlote hi a thlawna Damdawi pek nghal vek an ni.

Parliamentary Secretary pual inkhawm chu Khawmawi Market building tharah neih a ni a. Pu Laldingliana chuan sawrkarin mi retheite tana kawng hrang hranga hma a lo lak tawhna leh hmalakna tur kal lai mek te a tarlang a. Mi retheite leh dawm kan ngai hmangaihtu Mizoram sawrkar hmalaknate hmuhthiam a pawimawh takzet a thu te, sawrkar tha ti chak a, theihtawpa tawiawm hi mipuite tih tur dik tak a ni a ti.

Khawmawi khua in an mamawh em em High School building sakna turte leh khawtlang mamawh dang hrang hrangte chu Parliamentary Secretary ho hian thlir kual a ni a. Parliamentary Secretary hi nizan khan Thingfal ah a riak a.

Vawiin khan Tawipui tlangdung khaw hrang hrangte a tlawh a zanin hian Lunglei-ah a riak ang.

Pu Laldingliana hi Lunglei Civil Hospital Dr. Lalhriatpuia, bakah mi pawimawh hrang hrangin an tawiawm a ni.