Vawiin khan Health Minister Pu Lal Thanzara, Mizoram Football Association (MFA) President ni bawk chuan Mamit GSA Playground a MFA Cup 2018 kharna leh Final Match khelh chu khuallian niin a telpui.

MFA President Pu Lal Thanzara chuan District Level a Football Association te hnathawh leh an thawhhona tha  avangin Mizoram Football Association in tunhnaia nasa taka hma a sawn tih a sawi a. Tournament in buatsaih thin avangte, in hma lakna hrang hranga avangte leh football tihhmasawn nana theihtawp in lo chhuah avangtein Mizoram chu vawiina football thiam ber state tia hriat lar kan ni ta a, District Football Association zawng zawngte chunga in inpekna leh inthawhrimna avangin lawmthu ka sawi duh a ni, a ti. Tournament buatsaih thi thil hautak a ni a, Mamit District Football Association in MFA cup2018 zo taka an thlen theih nana sum leh paia tanpuitu te chunga lawmthu ka sawi a ni, a ti bawk.

Health Minister Pu Lal Thanzara chuan Sawrkar in thalai te tana khawvel thar a buatsaihna kawngah football tihhmasawn nan theihtawp chhuahin infrastructure te dinin a din mek zel a, tunah a rah hi kan seng mek a. Rampumah Football Club tha a Mizo player an tel vek a, Tournament lar ber berah kan hnenhna kan chang faia, India aiawh football team ah Mizo thalai tel lohna a awm lova, hengte zarah mi nuai 11 lek awm kan state Mizoram chu ram pumah football thiam ber state tia hriat lar kan ni ta te hi a ropuiin a lawmawm hle a ni, a ti. Football a inhmang leh player te chu nasa leh zuala tang tura chahin football hmangin ram leh hnam chawi sangtu ni turin player zawng zawngte a fuih.

 MFA Cup 2018 Final a inhmachhawn Mamit District aiawh Kawrte FC leh Kolasib District aiawh Project Veng FC te chu infiammi boruak dik tak sportmanship spirit mawi taka tilangtu ni turah chahin lawm takin Champion leh Runners Up dinhmun dawngsawng thiam turin players te a fuih tel bawk a ni. 

MFA Cup 2018 ah hian Mamit District chu Champion niin Kolasib District chu Runners Up an ni. 

MFA Cup hi kumtin Mizoram Football Association in District Level a Football Association-te innauna ti chaka football tihhmasawn nan an buatsaih thin a. MFA Cup hian nasa takin Mizorama football  chawisangin tun hmain football tihlarna kawngah Championship pawimawh leh lar ber a ni thin a ni. Tun MFA Cup hi a vawi 18-na niin kumin hian a vawikhatna atan Mamit District Football Association in MFA Cup an thleng a. Lawngtlai District tih loh chu District dang zawngin District aiawh Team an tir vek a ni. 

Team pahnih te hi a hun pangngaia in hnehtawkin hun pek belh extra time ah pawh tumahin goal an khung lova, Penalty Shootout ah Mamit District in goal khung Tam  zawkin an champion ta a ni. Lawmman dangte chu hetiang hi a ni : 

Top Scorer - Lallawmsanga, Champhai District

Best Player - Lalsangzuala, Kolasib District

Fair Play Team - Kolasib District

Champions Team in Trophy leh cheng nuai 1 an dawng a, Runners Up Team in Trophy leh cheng sing nga an dawng a ni.