Home Minister Pu R. Lalzirliana chuan vawiin khan Saitual Helipad, Saihmartlang a mi chu a hawng. Aizawl South-II Bialtu MLA Lt. Col. Z.S Zuala'n a tawiawm a, Saitual Block MHIP Conference 19-na, Saitual Auditorium-a neih chu an hmanpui bawk a ni.

Home Minister chuan Saitual khaw mipuite tana tangkai em em tur helicopter tumhmun changtlung tak an nei thar chu a lawmpui thu a sawi a. A puitlin theih nana Aviation leh PWD lam hmalakna chu fakawm a tih thu sawiin, sawrkar kum tharah NEDP kaltlangin Saitual Helipad panna kawng chu siam a la nih tur thu a puang bawk. Minister chuan  Saitual khuaa sawrkar hmalakna hrang hrang dangte tarlangin, hmasawnna hi a thuanthu lo reng reng a ni, a ti a. Hmasawn hna hlawhtlinna chu mipuite tawiawmnaah thui tak a innghah thu leh, mipuiten sawrkar ngaichang chunga an tih tur a tih thin avanga a lawm thu a sawi bawk.

Helipad hawnna hunah hian khualzahawm Lt. Col. ZS Zuala, MLA pawhin thu sawiin, Helicopter Service chuan hmun hla tak ami te pawh a hnuh hnaih thin avangin Saitual khaw mipuite leh tlawh duhtuten an chhawr tangkai hle a rin thu te leh, a bik takin damlo te tan malsawmna a nih ngei a beisei thu te a sawi tel a ni.

Helipad hawnna inkhawm hi Pu Saidenga, Deputy Controller, Civil Aviation Wing (GAD) chuan kaihruaiin, Pu R. Lalrintluanga, Chief Engineer (Roads) in report a pe a, PWD chuan Helipad hi Civil Aviation hnenah an hlan nghal a ni. Saitual Helipad hi Mizoram khaw 10 (Champhai, Lunglei, Kolasib, Hnahthial, Serchhip, Lawngtlai, Mamit, Siaha, Mualpui leh Saitual)-a Helipad siamna turin NLCPR Scheme hnuaiah Ministry of DONER atangin September ni 12, 2012-a sanction Rs 258.30 lakhs hmuh hmanga siam zing ami a ni a. Saitual Helipad sakna atan hian Rs 49.69 lakhs sen niin, 18.11.2014 khan hnathawh tan a ni a, 6.2.2017 khan zawh fel a ni. NLCPR Scheme hnuaia Helipad sakte hi Civil Aviation Department hnuaia awm, PWD in tender kova hna a enkawl a ni a. Hnathawh zawh hnu a Civil Aviation Department a hand over leh zel a ni. Mualpui Helipad tur hi 97 percent thawh zawh tawh a ni a, Lunglei ami erawh hi chu a hmun ala felloh avangin hna tan ala ni lo. A dang zawng hi chu thawh zawh tawh an ni. 

MHIP Saitual Block Conference an hmanpui naah Minister chuan Mizorama hmeichhiate chu kawng tam takah, a bik takin lehkhathiam lamah leh eizawnna lamah te mipa tlukloh an nih tak thu sawiin, heihi hmanlai hun nen khaikhin chuan hmasawnna duhawm tak a ni a, tu dang vang nilova anmahni hmeichhiate vek thawhrim rah a ni, a ti. Hmeichhiate chu chhungkua leh khawtlang nun nawmnaah mawhphurhna chelhtu pawimawh tak anni tih hre reng turin leh hnam tihmingthatu ni turin a chah. Khawtlang rorelna ah pawh Dan in a phut angin hmeichhia an tel chho zel chu thil lawmawm tak a nih thu sawiin, chutihrual chuan loh theih loh vang nilova mahni thahnemngaihna leh ram tana thawh duhna avanga ding ni ngei se a duh thu a sawi bawk. Minister chuan MHIP chu Mizorama tlawmngai pawl pawimawh ber te zing ami annih angin, khawtlang tana thawhpui zui zel atan a sawm bawk.

MHIP Saitual Block Conference hian ni hnih chhung awhin vawiin programme hi a tawpna a ni a, thusawi hrang hrang ngaihthlak a nih bakah Faina leh Tourism chungchangah Awareness Campaign neih a ni bawk.