Pi Vanlalawmpuii Chawngthu, Sericulture Minister chuan nimin khan Zialung Community Hall, Biate ah Upa Pawl Biate Area Conference a hmanpui a. Vawiinah Mualcheng Community Hall a E.Lungdar Area MUP Conference a hmanpui nghal.

MUP Area pahnih Conference a khuallian Pi Vanlalawmpuii Chawngthu chuan Upa pawl kalkhawm te hnenah thusawiin ram changkang leh hnam changkang apiangin aia upate an zahthiam a. Pathian nung ringlo zawk te pawn aia upate an zah a an duat thiam a nih chuan keini Pathian nung be tute chuan upa te kan zahin kan duat tur a ni. Tar chhia, tar rim nam, tar a tih tawngkam te hi i hmang fo lovang u. Heng hi hnam naupang zia a ni a, lo hmang thin te pawhin hmang tawh lovin upate duat a, enkawl uluk zawk tur in thangthar te pawh ka sawm nghal a ni. Kum upate avanga tun hun hi thleng kan ni. Aia Upate zahna kawngah in el thar leh ang u, a ti.

Upa Pawl Member zawng zawngte thangthar te tan in hlu a. Hriselna kawngah te kan taksa kan duat a tul hle a ni. Kan ngaihtuahna kan tih thar a, kan in lak fit thar a pawimawh hle. Kan ram leh kan hnam tan in hlu a, in tu leh fate tan rohlu in ni tih in in hriat thar fo a ngai a ni. Kan ram rorelna ah pawh kum upate uap na leh telpuina hi kan mamawh hle a ni. Chuvangin upa kan nih avanga in dah hniam lovin In hlutna hre thar a, in taksa,  rilru leh  hriselna  in enkawl uluk angai tih i hre thar fo ang u tiin kalkhawm upate a sawm a ni.

Biate Area huam chhung hi Biate, Sialhawk, Tlangpui, Tlangmawi leh Riangtlei khua te an ni. An Area huam chhungah hian upa pawl members 695 an awm bawk. E.Lungdar Area ah hian E.Lungdar, Leng, Sailulak, Mualcheng te an ni a, Area huamchhung ah hian Unit 6 awmin Members 820 an awm bawk a ni.

E.Lungdar Area Conference hian Resolution siam in "Tunaia mumal zawk hian Tar Pension hi a hun takah Pek ni tawh rawh se" tih chu lungrual takin an Pass.

Lengkhawm zai intihsiakna leh items hrang hrang a intihsiak in hun an hmang a. Kalkhawmten tlaiah ruai hlim takin an kil ho nghal a ni.