Vawiin khan Lawngtlai DC Conference Hall-ah Bawrhsap Dr Arun T., IAS hovin nu nau pai leh fa sen pawmte hamthatna tura sawrkar laipui scheme ruahman Pradhan Mantri Matru Vandana Yojana (PMMVY) chungchang sawi ho a ni a. Lawngtlai District chhunga CDPO-te, CMO ai awh te leh bank lam ai awhte an tel.

Bawrhsap chuan PMMVY chu nau chunga nu thihna leh nausen thihna tihhniamna tur scheme pawimawh tak a nih thu sawiin, Lawngtlai District-ah pawh hlawhtling taka kalpui a nih theih nan thawktute chu theih tawp chhuah turin a fuih a. Lawngtlai District ICDS Project hnuaia District Programme Coordinator chuan scheme chungchang a sawi fiah a. Hlawhtling taka kalpui a nih theih nana ruahmanna hrang hrangte sawi ho a ni.

PMMVY hi India ram dan anga pasal nei, kum 19 chin nu nau pai leh fa sen pawmte hamthatna tur a ni a. Nuin nau a pai laia uluk taka a inenkawl theih nan leh damdawi in ngeia nau neih intihhmuh a nih theih nana ruahman niin, January ni 1, 2017 hnu lama fa tir paite'n an dil thei a. A dil thei leh diltute hi aganwadi worker leh ASHA-te'n an bial theuhvah an lo chhinchhiah tur a ni a. A chhinchhiah hna hi Lawngtlai District chhungah pawh kalpui mek a ni.