Pu Lal Thanzara, Health & Family Welfare Minister chuan vawiin khan Conference Hall, Aizawl Civil Hospital-ah Mizoram Govt. Nursing Service Association 19th Biennial Gen. Conference nihnih awh tur a hmanpui.

Minister chuan Nurse te chu indaihlo reng rengin hna an thawk a. Chuti chunga vawiin ni thlenga thahnemngai taka hna an thawk thin chu lawmthu a sawi a. Nurse hna hi hna zahawm a niin Pathian rawngbawlna hna ropui tak a ni a ti. Pu Lal Thanzara chuan tunhnaiah department in hmingchhiatna kan tawh hi a vanduaithlak hle a, mahse hei hi hnual nan hmang lova, thahnemngai taka thawk chhunzawm zel turin Nurse hote chu a fuihin an damlo enkawlte chu hmangaih leh khawngaih taka enkawl a, an taksa mai nilovin thlarau damna keng tel thei se tha a tih thu a sawi a. Mizo Doctor thiamte phai lamah mi tam vak lo an thawh laiin kan Mizo Nurse te hi chu India ram mai bakah khawvel hmun hrang hranga Damdawiin leh Ramthar Rawngbawlna atan duh reng an ni hi a ropui a. Mizo min ti hmingtha a ni Minister chuan a ti bawk.

Vawiin inkhawmah hian Dr. K. Ropari, Principal Director, H & FW chu khualzahawm niin Nurse te tel lovin Hospital, PHC leh CHC a kal thei lo a ni tiin, an hnathawh chu rinawm leh thahnemngai taka thawk zel turin a chah a. Pension ta te citation pekna hun hman a nih bakah kumhnih chhunga an member pui boral ta te sunna hun hman a ni bawk. Pi Lalremmawii, N/S. CH (A) chuan inkhawmpui Thupui ‘Nurses : Present & Future Challenges chungchang sawi zauna a nei a.

Vawiin chawhnu leh naktuk hian rorelna hun leh hruaitu thar thlanna hun hman a ni.